Македонските и европските ѕвезди на едно место, децата рамо до рамо со своите идоли
Наместо класична прослава со роденденска торта, Спортско радио 90.3 ФМ ќе го одбележи својот 20-ти роденден со нешто навистина посебно – ракометен спектакл „Легендите на сцена“, што ќе се одржи на 29 октомври во СЦ „Јане Сандански“ во Скопје.
Овој настан нема да биде само ретро приказна за славните времиња на македонскиот ракомет – туку емотивна вечер што ќе ги обедини минатото и иднината, ќе ги спои генерациите и ќе им овозможи на најмладите да стојат рамо до рамо со своите идоли.
„Наместо да дуваме свеќички, решивме да запалиме искра на теренот,“ вели Тони Митев, директор на Спортско радио 90.3. Ова не е само прослава, туку начин да се оддаде почит на сите што ја пишуваа историјата на македонскиот спорт – и воедно да им дадеме инспирација на децата кои допрва ќе ја продолжат таа приказна.“
Младите ќе ги придружуваат легендите – симбол на иднината на ракометот
Во рамките на ревијалниот натпревар, организаторите подготвија специјален сегмент посветен на најмладите ракометари.
Пред почетокот на натпреварот, секоја легенда ќе биде придружувана од дете (10–12 год.) од македонските ракометни школи – млади спортисти кои ќе излезат заедно со своите идоли на паркетот, ќе стојат покрај нив при интонирањето на химната и ќе се поздрават со публиката во симболичен момент на прием на новата генерација.
Вечерта ќе кулминира со заедничка фотографија на легендите и децата во центарот на теренот – момент што веќе се најавува како „највредната слика на македонскиот спорт за 2025 година“.
📅 29 октомври 2025 | СЦ „Јане Сандански“, Скопје
🕖 Почеток: 19:00 часот
🎟 Билети достапни преку ticketx.com.mk – https://ticketx.com.mk/events/legendite-na-scena-01
Во Скопје ќе допатуваат и странски ракометни легенди – се очекува спектакл
Организаторите веќе потврдија дека во Скопје ќе пристигнат некои од најголемите имиња што настапуваа во Македонија – Арпад Штербик, Тимур Дибиров, Иван Чупиќ, Игор Вори, Страхиња Милиќ и Жоао Кањелас.
Но, тоа не е сè – упатени се покани и до уште неколку европски и светски ракометни ѕвезди, кои во следните денови треба да одговорат дали ќе дојдат во Скопје.
Доколку го потврдат своето присуство, спектаклот ќе стане уште поголем и ќе прерасне во настан без преседан во македонскиот спорт, со имиња кои до неодамна ги гледавме на најголемите европски сцени.
Една сала, неколку генерации, илјада спомени
На теренот повторно ќе заиграат Кирил Лазаров, Борко Ристовски, Стојанче Стоилов, Пепи Манасков, Филип Миркуловски, Наумче Мојсоски, Гоце Георгиевски, Петар Ангелов, Ванчо Димовски, Александар Царчев, Велко Марковски и многу други.
А во улога на селектори и судии ќе ги гледаме Лино Червар, Веселин Вујовиќ, Звонко Шундовски, Ристо Магдинчев, Маријан и Драган Начевски, Ѓорѓи Начевски – Славе Николов, Силвана Карбеска и Марија Илиева.
Билетите веќе се во продажба
Билетите се достапни преку платформата mktickets.mk, а интересот е огромен. Организаторите апелираат навреме да се обезбедат места, бидејќи салата „Јане Сандански“ ќе биде исполнета до последно седиште.
Настан што ќе ја спои гордоста и иднината
„Легендите на сцена“ е повеќе од ревијален меч – тоа е празник на македонскиот спорт, средба на генерации и потсетник дека спортот живее преку љубовта, инспирацијата и примерот.
📅 29 октомври 2025 | СЦ „Јане Сандански“, Скопје
🕖 Почеток: 19:00 часот
🎟 Билети достапни преку ticketx.com.mk – https://ticketx.com.mk/events/legendite-na-scena-01
