Претседателот на ЕХФ, Михаел Видерер, за време на Конференцијата за женските натпреварувања зборуваше за предизвиците и иднината на европските клупски турнири.
„Неопходно е да ги усогласиме интересите на сите страни – клубовите имаат свои цели, а ние мора да се грижиме и за националните првенства. Сè што менуваме мора да оди во таа насока,“ изјави Видерер.
Во своето обраќање тој потсети дека во 31 година постоење на женската Лига на шампиони, титулата ја освојувале клубови од само 11 земји, а вкупно 14 различни екипи.
„Мора да промовираме повеќе врвни екипи за да го засилиме нашиот производ. За тоа ни е потребна подобра системска работа – да најдеме најдобар начин клубовите да бидат мотивирани не само финансиски, туку и спортски,“ додаде првиот човек на ЕХФ.
Според него, напредокот е можен само ако се подобрат условите за организација на натпреварите, ако салите бидат полни и ако клубовите ја разберат својата важна улога во целиот процес.
„Подобри турнири можеме да имаме само со подобри арени, со публика што ќе ги исполни трибините и со клубови кои сфаќаат дека нивниот придонес е клучен,“ порача Видерер.
