Актуелениот кадетски шампион на Македонија, Eурофарм Пелистер (генерација 2008) продолжува да гради своја европска репутација со учество во Лигата на шампионите, најелитното клупско ракометно натпреварување за млади во Европа.
Ова е потврда за посветеноста, дисциплината и високото ниво на работа на младите ракометари и стручниот кадар на клубот.
Минатата сезона, генерацијата 2006 го постигна најголемиот успех на македонска младинска екипа на европската сцена, пласирајќи се на Ф4 турнирот во Келн и влезе меѓу најдобрите четири тимови во Европа. Овој резултат постави високи стандарди за следните генерации и инспирација за сегашната кадетска екипа.
Генерацијата 2008 ја продолжува оваа успешна традиција, претставувајќи го Еурофарм Пелистер, градот Битола и Република Македонија на највисоко европско ниво.
Клубот континуирано инвестира во младинските категории, градејќи силна база за идни ракометни шампиони и унапредувајќи го угледот на македонскиот ракомет на меѓународната сцена.
Групите, како и домаќините на турнирите за новата сезона ќе бидат познати наскоро.
