Ракометарите на Еурофарм Пелистер 2 славеше на гостувањето кај составот на Скопје со 34-30, и направи крупен чекор кон опстанок во суперлигашката конкуренција. Сега битолчани имаат 30 бодови и се вратија на првата позиција на табелата, додека Скопје веќе е прволигаш и може да прави планови како да се врати во елитата следната сезона.
Битолчани уште од стартот поведоа со 7-3, па потоа беше полесно да се одработи мечот. Иако скопјани пружаа отпор, сепак тоа беше недоволно, а гостите на пауза пет гол предност, 16-11.
Во второто полувреме, избраниците на Оливер Димитриоски успеаја да намалат на три погодоци негатива, но тоа беше се што можеа. Гостинскиот стратег Михаил Петровски повика минута одмор, Еурофарм Пелистер 2 одново отиде на плус пет и веќе беше готово.
Најдобри стрелци во победничкиот тим беа Ален Хаџиќ и Богдан Мијушковиќ со по десет погодоци, додека исто толку за тимот на Скопје постигна Дамјан Јакимовски. Во следната рунда, Еурофарм Пелистер 2 ќе игра на домашен терен против Голден Арт, додека Скопје ќе го пречека Мулти Есенс во натпревар на идните прволигаши.
ПОВРЗАНИ ВЕСТИ
