Левото крило веќе втора сезона по ред импресионира со своите настапи во Супер лигата, особено против поголемите клубови.
Еден од најголемите таленти на домашната сцена, левото крило од Прилеп, Давид Трајкоски, би требало на лето да се пресели во екипата на Кире Лазаров, дознава 24Ракомет. Со тоа продолжува идејата на клубот од другата страна на Вардар да собере се што може во своите редови.
Левото крило веќе втора сезона по ред импресионира со своите настапи во Супер лигата, особено против поголемите клубови, а во минатата сезона беше во изборот на 24Ракомет за најдобар млад ракометар. Договорот меѓу клубовите бил направен уште пред почетокот на сезоната по што следуваше трансфер на Божидар Илиески во Прилеп, како „компензација“.
Минатата сезона, Tрајкоски освен што имаше одлични настапи во суперлигашката конкуренција, беше одличен и во младинската лига, односно меѓу најдобрите стрелци кај младинците, па така уште повеќе го привлече вниманието на ракометната јавност.
Неговите одлични настапи го издвоија како еден од клучните играчи во тимот на Прилеп и му отворија можност за преселба во екипата на Кире Лазаров. Трајкоски потекнува од школата на Филип од Прилеп, каде започна неговиот ракометен пат.
Талентираното лево крило со своите настапи покажува огромен потенцијал и се смета за еден од најголемите млади таленти во Македонија, а селекторот на младинската репрезентација на Македонија, Раде Стојановиќ, го препозна неговиот талент и го стави на списокот за пријателските средби со Полска во март.
