На Куманово не му помогна ниту новиот голман од Куба, Адан Армандо Мартинез Калзадо кој само со неколку тренинзи со тимот играше во Битола против Еурофарм Пелистер 2, и домаќините победија со 30-28 (19-15)
И покрај победата битолчани мораа да се испотат, и да ги надминат моментите на слабост и пад на концетрацијата кога му дозволуваа на ривалот да се приближи резултатски и да внесе неизвесност. Особено што во последните минути внесоа неизвесност, а имаа шанса да направат и нешто повеќе.
Со новите два бода сега Еурофарм Пелистер 2 скокна едно место и на 6. позиција на табелата со 14 бода, еден повеќе од Бутел. Битолчани ќе го чекаат исходот од мечот на Прилеп и Бутел за да може бидат побликсу и до петтопласираниот Тиквеш кој има 16 бода. Куманово останува на претпоследното 11. место со само четири бода.
Малку изненадувачки гостите од Куманово во 6. минута имаа водство од 5-3, што беше причина тренерот на битолчани Александар Зарков да побара тајмауат, за да ги „искара“ своите ракометари. И тоа донесе плод, зашто брзо Еурофарм Пелистер израмни на 5-5 во 7 минута, а во 12 минута и првпат поведе со „плус 2“ за водство 9-7. Од тој момент па до крајот на полувремето домашните има предност која се движеше меѓу 2 и 4 гола, за предност 19-15 на полувреме.
Само што почна второто полувреме Еурофарм Пелистер во 6 минута пак имаше предност од четири гола, а потоа Куманово заигра. Гостите намалија на 22-21 во 41 минута,а во 45. имаа негатива од само 23-24. Домаќините поведоа со 25-23, а потоа исклучен беше Даневски, но Куманово не го искористи тоа. На другата страна исклучен беше Радојичиќ, но ниту Еурофарм Пелистер не го искористи тоа. Сепак битолските ракометари погодија за водство 26-23 во 48 минута, за ново „резултатско бегање“.
Секогаш кога домашните ќе се понадеваат дека се блиску да го скршат отпорот на гостите, тие возвраќаат со голови, па така во 52 минута Куманово намали на 26-25 внесувајќи повторно неизвесност. Дури и со играч помалку постiгнуваа голови, па Ончев намали на 27-26 во 54 минута. Потоа дојде и израмнувањето, 27-27.
Во последните клучни пет минути од средбата Куманово влезе со негатива од 27-28, но и напад. Тој напад не го искористија,а во контра Еурофарм Пелистер погоди за водство 29-27. Има шанса гостите да израмнат при резултат 29-28, но тој удар од крило го одбрани Мартин Јовановски. На 2,5 минути пред крај Еурофарм Пелистер 2 бараше тајмаут и имаше напад, кој заврши под „пасивен напад“ но без погодок. Во контра Александар Стојков шутна над стативата, па повторно битолчани беа во напад.
Петар Марковски се избори за пенал, а Бен Maхуд го претвори во погодок за 30-28. Ниту ударот на Димевски не стигна до голот, па остана малку време, и Еурофарм Пелистер ја прослави победата.
Бен Махуд со 11 гола беше најпрецизен кај Еурофарм Пелистер 2, а Славчо Шулески даде 6 гола. Во тимот на Куманово, најмногу 6 гола постигна Ончев, а Церубин даде 5 гола.
