Европската ракометна федерација ги делегираше официјалните лица за натпреварите од 13 коло во Лигата на шампионите кај дамите.
Македонските судијки Силвана Карбеска и Марија Илиева ќе патуваат за Дортмунд, каде ќе судат значаен натпревар.
Германскиот тим Борусија Дортмунд го пречекува Мец во натпревар што се игра на 15 февруари од 14:00 во „Вестпрес Арена“ во Хам.
Мец има 20 бодови на второто место и му фалат два бода за да го потврди второто место и директниот пласман во четвртфиналето, додека Борусија Дортмунд е шесто место со 8 бода, четири повеќе од седмопласираниот Сторхамар, кој има подобар меѓусебен дуел со германскиот тим.
На Борусија и треба најмалку бод за да остане шеста и да се пласира во осминафиналето, а освен со Мец, ќе игра и со лидерот Ѓер, додека Сторхамар ќе има полесни дуели со Будуќност на гости и Глорија Бистрица на домашен терен.
Сумирано, на двете екипи им е многу важен овој меч, а делегирањето за Карбеска и Илиева за овој дуел од страна на ЕХФ, уште еднаш ја покажа довербата која двете Македонки ја уживаат во Виена.
