Репрезентацијата на Хрватска е првиот финалист на Светското првенство 2025, откако во полуфиналето против Франција славеше со 31:28. Со 15 интервенции, голманот Доминик Кузмановиќ беше меѓу најзаслужните за обезбеденото финале.
За Хрватите ова е петто финале на Мундијалите, последното го играа во 2009 година. Избраниците на Сигурдсон за златото ќе се борат со подобриот од натпреварот меѓу Португалија и Данска.
Хрватска уште од воведниот дел наметна брз ритам и со цврста одбрана, која не им овозможуваше лесен продор на Французите, дојде до 3:1. Сепак, Франција бргу возврати и за две-три минути игра успеа да израмни, па така во 6-та минута имаше две тројки на семафорот.
Од тој период, па до 10-та минута Хрватска имаше плус два, потоа дојде и до плус три разлика, 7:4, и како одминуваше првото полувреме, така си ја зголемуваше предноста. Светскиот вицепрвак никако не можеше да заигра според посакуваното и ,,коцкестите” веќе кон средината на првиот дел дојдоа до солидна предност од 10:5.
Бековите на Хрватска погодуваа како на шега, а Франција полека ја губеше трпеливоста. Мартиновиќ, Срна и екс пелистерецот Мараш знаеја како да го совладаат Дезбоне и во 20 минута хрватската репрезентација стигна до плус осум, 15:7. Французите во последните десет минути од првиот дел доживеаа вистински бродолом, имаа негатива од 18:9 во 27-та минута, а по 30 минути игра резултатот беше 18:11 во корист за ,,коцкестите”.
Франција на стартот на вториот дел намали на 18:12, а веднаш црвен картон заработи Мин, кој до тој момент беше еден од подобрите во својата репрезентација. Преселбата на Мин на трибините не ги поремети редовите во составот на Жил, па така Франција во 35-та минута намали на минус четири, 19:15.
Откако Франција се закани, Хрватска излезе од малата криза, зголеми на 22:16 и до финишот ,,слатко” ја држеше стекнатата предност. Иако Франција при негатива од 27:24 во 50-та минута се надеваше дека може да дојде до камбек, сепак, ракометарите на Хрватска, со расположениот Кузмановиќ, не дозволија да си направат од готово-вересија.
Најефикасни кај Хрватска беа Звонимир Срна и Марин Јелиниќ, двајцата постигнаа по седум погодоци, шест додаде Иван Мартиновиќ, а четири запиша Матео Мараш. Кај Франција се истакна Дика Мем со осум погодоци.
