Олимпискиот шампион од Рио 2016 и една од легендите на данскиот ракомет, Хенрик Тофт Хансен, најави дека по завршувањето на сезоната 2025/26 ќе стави крај на својата професионална кариера.
Веста официјално ја потврди неговиот клуб, Морс.
„Сонував уште од дете да играм ракомет. Повеќе од 20 години тоа е мојот живот и горд сум што ќе ја завршам кариерата таму каде што таа и започна. Телото ми испраќа сигнали дека е време да сопрам, и не можам повеќе да ги игнорирам. Се радувам на последната сезона и се надевам дека ќе ја завршиме на најдобар можен начин и повторно ќе ја донесеме ракометната еуфорија во градот“, изјави Тофт Хансен.
Овој 38-годишен пивот има 148 настапи за данската репрезентација, со која го освои златото на Олимписките игри во 2016 година, титулата светски првак во 2019 и европската круна во 2012.
Во својата богата клупска кариера, Тофт Хансен настапуваше за голем број европски гиганти – ПСЖ, Алборг, Копенхаген, Бјерингбро, Хамбург и Фленсбург, а ќе ја заврши кариерата во тимот на Морс.
