Ракометарите на Партизан Гевгелија ја запишаа својата петта победа сезонава, откако на домашен терен го совладаа тимот на Овче Поле со 35-33 во натпревар од 13. коло во Првата лига.
Иако гостите во првиот дел во неколку наврати водеа со три-четири гола разлика, домашниот состав токму кога беше најпотребно покажа карактер и направи целосен пресврт. Партизан Гевгелија замина на полувреме со значајни пет плус, 20-15.
Во вториот дел следуваше уште поцврста игра на момците од гевгелискиот тим, кои го контролираа резултатот и постепено ја зголемуваа предноста. Во самата завршница се опуштија, дозволувајќи му на Овче Поле да намали и да избегне повисок пораз.
Најзабележителен во победничкиот тим беше Јован Гетов со дури 12 голови, сите од игра. Горан Лисичков постигна осум погодоци, Мартин Ашовалиев даде пет, а Димитар Атанасов имаше четири. Кај гостите, најдобри поединци беа Илија Димов со осум и Кирил Буровски со шест гола.
Во последното коло од есенскиот дел, Партизан Гевгелија ќе го пречека тимот на Кичево, додека Овче Поле ќе гостува кај Вардар Неготино.
