Трикратен светски шампион, олимписки првак и сега, за првпат и европски шампион – Матијас Гидсел го обележа Европското првенство.
Десниот бек беше предводник на Данска, која по пауза од 14 години одново се искачи на европскиот трон.
„Пресреќни сме. Бевме под огромен притисок, затоа што од нас секогаш се очекува злато. Сега ги имаме сите три трофеи“, изјави Гидсел.
Данска истовремено е олимписки, светски и европски шампион, подвиг што во машкиот ракомет претходно и успеа само на Франција. Данска последен пат ја освои европската титула во 2012 година.
„Одигравме неверојатен турнир. Се соочивме со многу проблеми, можеби бевме и малку понестабилни отколку на други натпреварувања, но на крајот завршивме на пиедесталот, тоа е најважно. Се гордеам со мојата екипа, со навивачите и со сите околу тимот. Ова е вистински тимски успех.“
Иако Данска досега двапати била европски шампион, никогаш претходно Данец не бил прогласен за МВП на ЕП – ниту Микел Хансен, ниту Никлас Ландин, ниту Ханс Линдберг. Пред две години Гидсел беше најдобар стрелец на ЕП, но тогаш Недим Ремили ја освои и МВП титулата.
„Не можам да постигнам ниту еден гол без помошта на соиграчите. Ние сме тим. Секако дека сум среќен што му помогнав на тимот, но победуваме заедно.“
Со ова Европско првенство, Гидсел ги обедини сите можни индивидуални и екипни признанија – златен медал, МВП и за најдобар стрелец.
„Златниот медал е најважен – тоа е трофејот што ни недостасуваше. Но, среќен сум и поради индивидуалните награди, бидејќи покажуваат дека сум помогнал на највисоко ниво. Мислам дека наскоро ќе ми треба нова соба за трофеите во куќата на моите родители“, изјави Гидсел со насмевка.
Со репрезентацијата на Данска, од дебито во 2021 година, освои пет златни, два сребрени и еден бронзен медал, пет пати беше МВП и пет пати најдобар стрелец на големи натпреварувања.
На ЕП 2026, 26-годишниот десен бек на Фихсе Берлин постави и историски рекорд – неговите 68 голови, од кои седум во финалето, се најмногу постигнати од еден играч на едно ЕП. Претходниот рекорд го држеше Сандер Сагосен со 65 голови од ЕП 2020.
„Не го знаев тоа, но звучи одлично. Кога ќе остарам, ќе морам да им докажам на децата и внуците дека сум бил успешен ракометар, а ваков рекорд и овие медали се добар доказ“, рече Гидсел.
Гидсел беше незапирлив на овој турнир – ниту од противниците, ниту од сопствениот селектор Николај Јакобсен, кој постојано се обидуваше да му даде одмор. Со речиси 500 минути на терен во девет натпревари, Гидсел имаше најголема минутажа на првенството.
РЕПРЕЗЕНТАТИВЕН БИЛАНС НА МАТИЈАС ГИДСЕЛ ОД 2021 ГОДИНА:
Светско првенство 2021
🥇 Златен медал
⭐ Ол-стар тим
🤾♂️ 39 голови
Олимписки игри 2020
🥈 Сребрен медал
🏆 МВП
🤾♂️ 46 голови
Европско првенство 2022
🥉 Бронзен медал
⭐ Ол-стар тим
🤾♂️ 38 голови
Светско првенство 2023
🥇 Златен медал
🏆 МВП
🤾♂️ Најдобар стрелец – 60 голови
Европско првенство 2024
🥈 Сребрен медал
⭐ Ол-стар тим
🤾♂️ Најдобар стрелец – 54 голови
Олимписки игри 2024
🥇 Златен медал
🏆 МВП
🤾♂️ Најдобар стрелец – 62 голови
Светско првенство 2025
🥇 Златен медал
🏆 МВП
🤾♂️ Најдобар стрелец – 74 голови
Европско првенство 2026
🥇 Златен медал
🏆 МВП
🤾♂️ Најдобар стрелец – 68 голови
