Македонскиот првак Еурофарм Пелистер загуби четвртипат оваа сезона во Лигата на шампионите, откако Барселона славеше во Битола со 34-30.
Пелистерци тргнаа одлично во првото полувреме, дваесетина минути беа во егал со каталонскиот гигант, а Митревски имаше свои моменти. Се играше најчесто гол за гол, и да не беа техничките грешки, македонскиот тим можеше да води со повеќе од еден погодок.
По 11-10, Барса направи серија од четири голови преку Макуц и Фабрегас за 15-10, а таквата разлика ја одржаа избраниците на Ортега до паузата.
Еурофарм Пелистер – Барселона
Имаа гостите и плус седум на стартот на вториот дел, 24-17, но домашните не се предаваа и успеаја да ја стопат негативата на четири погодоци. Митревски продолжи да брани во одлична форма, тренерот Гарабаја ротираше со составот, а Хенигман одново спушти на минус четири, 31-27.
Со цепелин од гол на гол меѓу Митревски и Манасков што ја запали публиката беше 33-30, но сепак немаше многу време за комплетен камбек на македонскиот првак и Барса рутински ги одработи последните неколку минути од натпреварот.
Во следното коло Еурофарм Пелистер ќе му гостува на европскиот првак Магдебург.
