Поранешниот капитен и рекордер на машката репрезентација на Белорусија, Борис Пуховски, е избран за заменик-претседател на Ракометната федерација на Белорусија. Одлуката ја донесе Извршниот комитет на федерацијата, а Пуховски ќе биде задолжен за развојот на ракометот во регионите на земјата.
Пуховски го заврши својот импресивен играчки пат ова лето, а негов последен клуб беше српската Војводина. Во својата кариера настапуваше за СКА Минск и Динамо Минск, украинскиот Мотор и унгарскиот Чурго. Тој е трикратен шампион на Белорусија (2010, 2011, 2012), двоен освојувач на Купот, шампион на Украина (2016, 2017) и шампион на Србија (2023).
Покрај клупските трофеи, Пуховски остави длабока трага и во националниот тим – настапи на четири Европски првенства (2008, 2014, 2016, 2018) и три Светски првенства (2013, 2015, 2017), поставувајќи рекорд со 205 одиграни натпревари и 865 постигнати голови.
Назначувањето на Пуховски се гледа како чекор кон модернизација и јакнење на белорускиот ракомет, со цел поголема поддршка на развојот во младинските школи и регионалните клубови.
