Тимот на Атлетик, кој сосема извесно од наредната сезона ќе биде дел од елитната женска конкуренција, ја продолжи соработката со една од најмладите ракометарки.
Потпишан е нов договор со левиот бек Анастасија Величковска, кој е со важност до 2029 година, па поранешната младинска репрезентативка ќе остане најмалку уште три сезони во тимот на Татјана Хмирова.
Со овој потег Атлетик покажа дека работи на долги патеки и дека планира да игра важна улога во македонскиот ракомет. Претходно на три сезони беше продолжена соработката и со капитенот Матеа Чурлиновска.
Атлетик ја заврши полусезоната со 11 победи на 11 натпревари и максимален број на бодови по есенскиот дел во Првата лига.
