Откако Еурофарм Пелистер го освои првиот бод сезонава во ЕХФ Лигата на шампионите против тимот на Спортинг, за битолчани веројатно доаѓ период во кој тимскиот дух и атмосфера се на уште повисоко ниво. Во домашното првенство им претстојат неколку важни средби, а една од нив е мечот со тимот на амбициосниот Охрид закажан за во недела.
Гостите доаѓаат како еден од двата тима без пораз после 6 одиграни натпревари во првенството на Македонија. Средбата е закажана за в недела во салата „Боро Чурлевски“ во Битола од 18 часот. За двата тима средбата има големо значење. За домаќините да се вратат на врвот, а за гостите секој бод значи и останување во трката за висок пласман, па дури и мешање во борбата за титулата.
Охрид ја има најдобрата одбрана досега во првенството со само 122 примени голови, и најдобрата гол разлика (+76). Еурофарм Пелистер пак е втор најпрецизен тим во првенството (постигнати 199 гола) и ја има втората најдобра одбрана (само 138 примени голови).
„Се уште не се средени впечатоците од натпреварот кој го одигравме со екипата на Спортинг Лисабон, а веќе во недела не очекува значаен натпревар од домашното првенство против екипата на Охрид во Битола. Ни доаѓа екипа со досега 6 победи, но ние ќе дадеме се од себе и на овај натпревар да забележиме победа. Натпреварот кој добро го одигравме против Спортинг треба да биде насока како да играме на секој следен натпревар, како и во домашното првенство така и во Лига на шампиони, вели Бранислав Ангеловски, тренерот на битолскиот тим.
Во последните две сезони екипите на Еурофарм Пелистер и на Охрид играле петпати на официјални средби во Првенствот и Купот, и на сите победиле домашните ракометари. Лани во Битола триумфираше Еурофарм Пелистер со 31-27, и тоа со пресврт во последната четвртина од натпреварот во корист на битолчани.
Сезонава Охриѓани се засилија со повеќе квалитетни ракометари, а тимот на Еурофарм Пелистер ја подига формата во играта. Осоколени после добрата партија во средата, имаат нов мотив за докажување.
ПОВРЗАНИ ВЕСТИ
