Селекторот на машката ракометна репрезентација на Германија, Алфред Гисласон, откри дека во времето кога бил тренер на Магдебург имал понуда да го преземе европскиот гигант Барселона, но ја одбил.
Исланѓанецот беше на клупата на Магдебург од 1999 до 2006 година, период во кој изгради голема репутација и се етаблираше како еден од најдобрите стратези во Европа.
„Одбив неколку понуди од клубови на кои тешко се вели ’не’. На пример, кога веќе четири или пет години работев во Магдебург, Барселона ме покани на разговор за да станам нивни тренер. Но јас одлучив да останам. Веќе имав донесено неколку млади играчи и сакав да изградиме нешто заедно. Никогаш не би можел да постапам така – тие да дојдат, а јас да си заминам“, изјави Гисласон.
Тој додаде дека можеби тоа била пропуштена шанса во кариерата, но исто така верува дека токму таквата одлука му го отворила патот кон Кил, каде што остави голема трага.
