Ракометарките на Вардар полесно од очекувањата славеа со 33-28 во натпреварот од 6 коло во Супер женската лига.

Натпреварот го одбележаа ракометарката на Вардар, Леона Миленкоска, како и двете членки на Атлетик, Сара Богојеска и Анастасија Величковска, кои постигнаа по десет погодоци.

По 6-6 по десетина минути, Вардар отиде на плус три, 9-6, и оттогаш до крајот на натпреварот не ја испушти предноста, која не беше помала од три погодоци. На паузата избраничките на Даниела Новеска водеа со 14-11, а во вториот дел немаше големи возбудувања.

Покрај Миленкоска, во победничкиот состав се истакнаа Трифуновска со седум, Тодоровска со шест и Мила Лашкоска со пет погодоци, а кај Атлетик пет пати погоди Дамјановска.

Во следното коло по ЕХФ паузата, Вардар ќе го пречека Пелистер, додека Атлетик ќе му гостува на Ѓорче Петров 2.

Ракометарите на Вардар ги очекува гостување кај Нант во 5 коло од Лигата на шампионите, кое не може да смени многу за македонскиот првак во поглед на пласманот во ТОП 12, но важно е за домаќинот во битката за главната рунда, а за вардарции во битка за трето место, што носи повластена позиција во ждрепката за елиминациите во Лигата на Европа.

Тренерот Иван Чупиќ вели дека неговиот тим посакува прва победа оваа сезона во елитната конкуренција.

„Сакаме да победиме и да останеме конкурентни, како што бевме досега. Знаеме дека е многу тешко да се победи во Нант. Не сакам да размислуваме дека ќе биде доволно само да одиграме добар натпревар и да оставиме позитивен впечаток. Во Нант мора да се бориме и да го покажеме вистинскиот пристап и менталитет, како што сме правеле секогаш. Тоа никогаш не смее да недостасува во нашата игра“, вели Чупиќ.

Вардар продолжува во ЛЕ, но ќе остане битката за третото место ако Мелсунген загуби од Висла Плоцк.

„Ова се тешки моменти за нас. Имавме високи очекувања и се надевавме дека ќе ја минеме групната фаза. Сепак, сакаме да испратиме порака за иднината – дека сè уште сме живи и конкурентни и дека овој тим продолжува да се развива. Секој натпревар во Лигата на шампионите е како финале за нас. Мораме да се претставиме во вистинско светло и да учиме од секој натпревар“, заврши Чупиќ.

Натпреварот меѓу Нант и Вардар се игра во „ХХЛ Арена“ в среда со почеток од 20:45 часот.

Тажна вест во текот на денот сподели грузиската ракометна федерација – на 40 години почина Рати Мсквилидзе.

Некогашниот десен бек на Еурофарм Пелистер (во времето кога клубот ја имаше додавката Работник), по завршувањето на играчката кариера работеше како тренер на млади категории.

Мсквилидзе во Битола мина една сезона (2017/18) и во дресот на пелистерци настапуваше во Челинџ Купот на ЕХФ.

Кариерата ја заврши во дресот на турскиот Трабзон во сезоната 2021/22, претходно освен во Македонија играше во татковината за Шевардени Тбилиси и Батуми, беше дел и од исландскиот Стјарнан, српската Металопластика…а беше и стандарден репрезентативец на Грузија.

„Рати Мсквилидзе имаше значаен придонес во развојот на грузискиот ракомет. Во текот на својата спортска кариера настапуваше за клубови во Грузија, како и за различни европски клубови. Подоцна се посвети на тренерската работа, пренесувајќи им ги своето искуство и знаење на помладите генерации. Неговата смрт претставува голема загуба за грузискиот ракомет и спортската заедница“, напишаа од грузиската федерација.

Причините за ненадејната смрт не се соопштени.

Европската ракометна федерација ги делегираше официјалните лица за натпреварите од второто коло во ЕХФ Европскиот Куп.

Покрај судиите Илиевски, Македонија на европската сцена ќе ја претставува и делегатот Ацо Николовски.

Тој беше делегат на два меча од женскиот ЕХФ Куп минатиот викенд на Косово, каде играа Феризај и ВИФ од Фарски Острови, а сега ќе има двојна задача и во машкиот ЕХФ Купот.

Денеска Николовски ќе биде делегат на пресметката меѓу турскиот Бешикташ и Фиверс Маргаретен од Австрија во Истанбул што ќе започне од 16:00 часот.

Утре Николовски ќе биде задолжен за се да мине во најдобар ред на дуелот меѓу Бурса и норвешкиот Рунар Сандефјорд што се игра во Бурса и ќе стартува од 16:00 часот.