Денес во нашата држава стартуваше единствениот турнир во женска конкуренција „Ѓорче Петров Куп 2023“ кој ќе се игра до 27 август.
На првите одиграни натпревари, кои поради временските неприлики, беа одиграни во спортската сала „Христо Батанџиев“ во Волково, немаше изненадувања.
Домашната екипа на Ѓорче Петров победнички го започна настапот на турнирот, откако во дуелот со Бор триумфираше со 12 гола разлика, 35:23 (20:13).
Најефикасни во победничката екипа беа Ана Марија Коларовска со осум и Емилијана Ризоска со седум погодоци. Кај гостинките, прв стрелец беше Исидора Сујиќ со шест реализации.
Во групата А, во која се наоѓа и Ѓорче Петров, тимот на Црвена Ѕвезда целосно ја надигра Панорама со 38:25 (22:12).
Поранешниот македонски шампион Вардар во рамки од групата Б претрпе пораз од актуелниот грчки шампион ПАОК со 30:24 (12:16).
Кај вардаровиот тим најефикасна беше Ивона Трпевска со шест погодоци, по пет запишаа Сара Стефаноска и Борјана Коцева. Во составот на грчкиот шампион настапи и повремената репрезентативка на Македонија, Александра Боризовска, која постигна два погодоци.
Во истата група, актуелниот бранител на титулата од ланското издание, Бекаменд, доживеа пораз од Железничар, загуби со четири гола разлика, 31:27 (16:12).
ПОВРЗАНИ ВЕСТИ
