Ракометарите на Барселона ја продолжуваат победничката серија во Лигата на шампионите и остануваат со максимален ефект после осум одиграни кола. На гостувањето во Данска кај Алборг, клубот од Шпанија славеше со 35:32.
Натпреварот беше интересен и неизвесен до крајот особено во завршницата кога Алборг израмни и имаше напад за водство, но не успеа и на крајот беше поразен.
Почетокот на натпреварот беше рамноправен до 10. минута и резултат 5:5, потоа следуваа два гола на Барселона за два позитива која ја одржуваа без многу проблеми. Во завршниот дел од првото полувреме избраниците на Чави Пасквал стигнаа до четири гола предност, а така беше и на полувреме кога гостите водеа со 19:15.
Поголемиот дел од второто полувреме се играше гол за гол сè до 50. минута кога започна кризата во играта на Барселона. Алборг ја топеше негативата и во 56. минута стигна до израмнување 31:31, а имаше и напад за водство. Сепак, домаќините не ја искористија шансата и до крајот со по два гола Циндриќ и Палмарсон донесоа триумф за Барселона и задржување на максималниот ефект.
Најефикасен во победничкиот тим беше Арон Палмарсон со шест погодоци, додека по пет гола постигнаа Циндриќ и Нгесан. Добро издание имаше Перез Де Варгас со 15 интервенции. Во тимот на Алборг фантастична партија имаше Николај Кристенсен со десет погодоци.
