Суперлигашите активни до Нова Година, Металург го чека пекол – 7 средби за 11 дена!

Иако беше планирано да заврши до крајот на октомври, есенската полусезона од Суперлигата ќе трае (најмалку) до 27 декември. Првичниот план на РФМ, кој беше да се одиграат 14 кола во забрзан ритам до крајот на октомври не се реализираше.

Прашање е дали таквата одлука воопшто требаше да биде донесена, со оглед на тоа што полусезоната сега ќе заврши во ист термин како досега во претходните сезони. Ако ништо друго, да се играше едно коло неделно ќе имаше помалку одложени натпревари и хаос со термините.

Суперлигашите немаше да играат „три средби за три дена“ и тренерите ќе можеа да одработат поквалитетни тренинзи и подобро да го подготват тимот за секој ривал. Пролет играше пет натпревари во осум дена, сега Металург практично од карантин ќе излезе на терен, и ќе одигра дури седум средби за 11 дена – шестте заостанати средби од Суперлигата плус една од Лигата на Европа. Тимот од Автокоманда ќе има повеќе натпревари во месец декември отколку тренинзи, па ќе видиме како сето тоа ќе изгледа на теренот.

Во групата А останува да се одиграат уште шест средби, додека во групата Б ќе бидат на програмата уште 12 натпревари, по кои ќе бидат познати сите патници во плеј-оф и плеј-аут.