Ракометарите на ПИК Сегед славеа на гостувањето кај Елверум со 24-27 и му направија услуга на македонскиот првак Вардар, кој со триумф во Скопје против норвешкиот првак може само да го потврди петтото место во групата, без разлика на исходот од дуелот со Мешков Брест.
Елверум одржуваше рамнотежа во првиот дел против унгарскиот првак, кој играше без Бомбач, Тонесен и Степанчиќ. Домашните водеа во повеќе наврати, два пати и со плус три, но сепак на пауза ПИК Сегед имаше гол позитива, 12-13.
На стартот на вториот дел домашните израмнија и се играше гол за гол до 17-17, пред гостите да ја направат клучната серија од три гола преку Фримел и Бодо и да се одлепат на плус три, 17-20.
Избранинците на Хуан Карлос Пастор рутински го приведоа натпреварот до крајот, иако домашните не се предаваа. Најдобар стрелец во триумфот на ПИК Сегед беше Фримел со шест гола, а пет постигна пикерот Банхиди, додека кај Елверум се истакна Хеидал со седум погодоци.
ПОВРЗАНИ ВЕСТИ
