Младост Богданци славеше против Македонија Ѓорче Петров со 23-22 во драматично дерби од 12 коло на Првата лига. Херој на домашните кои имаа плус два во финишот, 23-21, беше голманот Горан Паунков, кој го одбрани шутот за реми во последна сеунда на Ѓорѓевски.
Домашните поведоа со 7-2 на стартот и помислија дека лесно ќе стигнат до бодови, но гостите не мислеа така. Како одминуваше врмето, така гостите полека се враќаа во игра и ја намалуваа негативата, па до паузата стигнаа до 13-11.
Во второто полувреме избраниците на Оливер Димитриоски направија и комплетен пресврт, првпат и единствен пат водеа со 17-16, а во последните десетина минути с влези со реми, 20-20.
Беше и 21-21, гостите на два пати не реализираа, па беа казнети со голови од искусните Стоилов и Роглев за 23-21. Потоа Младост имаше шанса за плус три, но не погоди, а на спротивната страна Димовски намали на 23-22.
Домашните имаа последен напад, не дадоа гол и гостите тргнаа по реми. Немаа многу идеја во нападот, но сепак упатија удар преку Ѓорѓевски, кој беше одбранет од Паунков и славјето на домашните може да почне.
Најдобри стрелци во победничкиот тим беа Антонио Николоски со осум и Митко Стоилов со четири гола, додека кај Македонија Ѓорче Петров се истакнаа Мартин Димовски со десет и Александар Ѓорѓевски со седум погодоци.
Сега Младост Богданци на второто место има 27 бода, три помалку од лидерот Мулти Есенс, додека Македонија ЃП оостанува на четвртото место со 18 бодови.
ПОВРЗАНИ ВЕСТИ
