Тимот на Прилеп во пролетниот дел од сезоната во Суперлигата ќе биде посилен за двајца ракометари кои есента настапуваа во Тиквеш од Кавадарци.
Станува збор за средниот бек Марио Гичев и кружниот напаѓач Марко Трајковски, кои ќе ги надополнат местата во прилепскиот тим што останаа празни по заминувањето на Христијан Милошески и Александар Тренчевски.
Гичев и Трајковски дојдоа во Кавадарци по барање на поранешниот тренер Ристо Магдинчев, а кај Горан Андоновски немаа голема минутажа и решија да побараат нова средина.
Средниот бек Гичев беше дел од Текстилец, Вардар 2, Работнички, Пролет, Јуниор Кисела Вода, додека Трајковски играше за Пролет, Јуниор Кисела Вода и Бутел Скопје.
Прилепчани веќе стартуваа со подготовките за пролетниот дел од суперлигашката конкуренција, а првите тренинзи ќе ги пропушти грузиското трио Мириани Гавашелишвили, Зураб Цинцадзе и Реваз Чантурија, кои имаа обврски со националниот тим.
Тренерот Горан Кузманоски планира пријателски натпревари против српскиот тим Дубочица Лесковац на 21 и 22 јануари, пред стартот на Суперлигата на 2 февруари.
Тиквеш беше изненадување на полусезната – ама двајца си заминуваат
ПОВРЗАНИ ВЕСТИ
