Ракометарите на Вардар утре го играат првиот четвртфинален натпревар од дивизијата „Југ“ во регионалната СЕХА лига против српскиот првак Војводина.
Гостите доаѓаат со комбиниран состав, а тренерот Борис Ројевиќ нагласи дека приоритети на тимот од Нови Сад е Европскиот Куп каде ќе играат полуфинале.
„Не сум сигурен дали досега сме имале толку натпревари во една сезона. Од една страна, тоа е добар доказ дека правиме нешто добро, играме во повеќе натпреварувања. Од друга страна, мора да бидеме паметни и да ги одредиме приоритетите. Се соочуваме со многу повреди во моментов и во Скопје ќе патуваме со комбиниран тим од играчи кои покажаа дека можат да имаат квалитетни изданија во СЕХА“, изјави Ројевиќ.
Средниот бек Бранко Томиќ вели дека мечот со Вардар е убава можност некои играчи да видат до каде се.
„Голема работа е да играте против тим како Вардар. Независно од ростерот на играчи, наша цел е победа. Ова ќе биде убава можност некои играчи да видат до каде се во моментов, да ги потврдат своите способности и да почувствуваат како е да се игра против Вардар. Верувам дека ќе го дадеме најдоброто од нас“, вели Томиќ.
Мечот меѓу Вардар и Војводина се игра утре од 18:00 часот во СЦ „Јане Сандански“, додека реваншот е на 11 април во Нови Сад.
ПОВРЗАНИ ВЕСТИ
