Момчињата кои пораснаа заедно со Парондо, денеска ќе истрчаат против него

Домаќинот на СП, Египет, предводен од шпанскиот стратег Роберто Гарсија Парондо, денеска (18 часот) е вториот противник со кој нашата селекција ќе се соочи во групната фаза во Каиро.

Интересно е што Парондо кусо време беше дел од стручниот штаб во А националниот тим на Македонија (на ЕП 2018 во Хрватска како помошник на тогашниот селектор Раул Гонзалез), а исто така беше дел од тимот и на Илија Темелковски, кога тој ги предводеше младинците до најголемиот успех – 6. место на Светското првенство У21 во Алжир во 2017 година.

Парондо тогаш беше задолжен за анализа на противниците, со која овозможи одлична тактичка подготвеност и даде можност Темелковски да има одговор за секој ривал. Шпанецот имаше слична функција и на Медитеранските игри во Тарагона година дена подоцна, кога Македонија настапи со Б селекција, чија основа е тимот беше истата таа екипа.

Од тој состав, денеска дури седуммина репрезентативци се на списокот на Данило Брестовац – Мартин Велковски, Филип Талески, Мартин Томовски, Филип Кузмановски, Марио Танкоски, Никола Даниловски и Горан Крстевски. Момчињата кои пораснаа во А репрезентативци, а тоа го сторија пред очите на Парондо. А и Парондо како тренер растеше пред очите на македонските ракометари, со оглед на тоа дека тренерската кариера и ја започна во Македонија.

„Натпреварот со Шведска мора што побрзо да го заборавиме и да го оставиме зад нас. Фокусот е на следните два натпревари на кои имаме шанса да фо поправиме лошиот впечаток со кој го отворивме првенството. Ни останаа две шанси за пласман во групната фаза, од кои првата е против домаќинот Египет. Одлична екипа со физички силни играчи, кои играат агресивна одбрана и имаат силни бекови. Селектор им е Роберто Парондо, кој одлично го познаваме. Очекувам тежок натпревар во кој ќе мора дда се бориме 60 минути и да се покажеме во многу подобро издание од она пред два дена“, заклучува бекот Мартин Велковски.