Ракометарките на Куманово ја продолжуваат серијата без пораз во Женската лига, откако славеа на гостувањето кај Ѓорче Петров со 20-24. Со оваа победа шампионот се издвојува на врвот на табелата со 20 бода, а ѓорчевки ќе останат на втората позиција со 17 бодови.
Избраничките на Симе Симовски тргнаа добро, поведоа со 2-0 и 4-2, но тука застанаа. Кумановки ги неутрализираа бековите на Ѓорче Петров и полека ја преземаа контролата на теренот.
Направија пресврт и поведоа со 4-6, а домаќинките не погодија десет минути. Во продолжение се разбрани голманката на Куманово, Катарина Митровиќ, а Сара Цветановска го полнеше голот на Ѓорче Петров за највисоки плус пет, 6-11. Уште повеќе се влошија работите за домашниот тим во финишот на полувремето, кога шампионот стигна и до водство од шест гола, 7-13.
Каде што застана, таму продолжи гостинскиот тим на стартот на вториот дел. Голманката Митровиќ одбрани два удари, а нападот на Ѓорче Петров немаше многу идеја. Беше 8-15, Антиќ запре пенал на кумановки, па домаќинките врзаа два гола во серија за 10-15.
Се разбудија ракометарките на Ѓорче Петров, се разбуди и публиката во продолжение од натпреварот, намалија на 13-17, но тоа беше се од нив. Создаваа шанса домашните, но секогаш пред нив се испречуваше Митровиќ.
Кога Куманово се одлепи на 16-23, веќе беше јасно кој ќе ги освои бодовите на овој натпревар. До крајот Ѓорче Петров само го ублажи поразот до конечни 20-24. Најдобри стрелци кај Куманово беа Цветановска со шест и Алмеида со пет погодоци, но јунак на мечот беше голманката Митровиќ со 21 одбрана. Кај Ѓорче Петров се истакнаа Ана Марија Коларовска со седум гола и Симона Стојановска со четири погодоци.
ПОВРЗАНИ ВЕСТИ
