Македонскиот репрезентативец Дејан Манасков е нов член на Вардар и по пауза од шест години повторно го облекува „црвено-црниот” дрес. Вардар го засилува тимот со искусен играч на позицијата лево крило кој зад себе има настапи во неколку европски екипи и настапи на ЕП и СП со репрезентацијата на Македонија.
Вардар добива брз, прецизен и искусен играч со големо меѓународно искуство со што екипата повторно гради силен, респектабилен и конкурентен тим и за сезонава. „Црвено-црните” полека го градат тимот со кој и сезонава ќе атакуваат на двојната круна во домашното првенство.
„Драги навивачи на Вардар, драго ми е што се враќам во овој клуб после долго време и се надевам дека сите заедно ќе ги оствариме целите. Се надевам дека ќе го вратиме Вардар каде што припаѓа и сите заедно ќе се радуваме на нови успеси“, вели Манасков.
Манасков во Скопје доаѓа по неколкуте сезони минати во унгарски Веспрем каде беше еден од најдобрите стрелци на клубот со над 540 голови на над 160 натпревари. Претходно настапуваше за екипите на Борец Велес, Металург, Вардар, Вецлар, Рајн Некар и на крајот во Веспрем.
ПОВРЗАНИ ВЕСТИ
