Клубовите од Македонија во машка конкуренција за новата сезона имаат пад од две места. Според поените кои се добиваат за направеното во европските купови при рангирањето за сезоната 2021/22 македонските машки тимови имаат помалку поени и паднаа за две места.
Третото место кое го имаа за сезоната 2020/21 сега е загубено, но нема никакви промени во однос на местата кои се добиваат за пласман во европските купови, па Македонија од машките клубови ќе има едно место во Лигата на шампионите и три во Лигата на Европа.
Според ова сè останува исто како и за оваа сезона така што е сосема извесно дека Македонија ќе има четири екипи и во следната сезона во Европа.
Инаку, пред Македонија во рангирањето се најдоа Шпанија и Унгарија кои на последната табела беа под, а дојде до промена на врвот. Сега Франција е првопласирана, додека Германија го има второто место.
При рангирањето се сметаат последните три сезони, а тука ги нема резултатите од 2017 година кога Вардар ја освои првата круна во Лигата на шампионите така што на ова и се должи падот од две места.
