Ракометарите на Еурофарм Пелистер загубија во првото коло од групната фаза на Лигата на Европа од данскиот тим Скандерборг Архус со 30-27. Победата на гостите беше најавена уште по првото полувреме, кога водеа со четири гола разлика, 16-12.
Гостите го постигнаа првиот гол на мечот, но потоа имаа пост од шест минути. Битолчани погодуваа преку Танкоски и Кузманоски за 3-1, пред Архус да намали на 3-2. Следуваше најдобриот период на Еурофарм Пелистер, кога беа искористени неколку грешки на ривалот.
Крилата Кузманоски и Костески погодија во контранапади за 7-3, но како одминуваше времето, така Архус се враќаше во игра. Хосни постигна гол за 10-7, но потоа почнаа грешките во нападот.
Тренерот Валтер ротираше во ростерот, но по 11-9, битолчани неможеа да погодат цели седум минути. За тоа време, гостите погодија пет пати и веќе беше 11-14. Танкоски го прекина постот со голот за 12-14.
Eурофарм Пелистер имаше шанса за минус еден, но Пешевски не погоди, па Архус казни за 15-12. Уште еден напад на домашните не беше реализиран, па со погодок од пенал, данскиот тим на пауза замина со плус четири, 16-12.
Македонскиот тим намали на 16-14 на стартот на вториот дел, но гостите стигнаа и до највисоки плус пет, 21-16. Кизиќ влезе во игра на место на Лесјак, фати три удари во серија на Архус, па Еурофарм Пелистер преку разиграниот Атанасијевиќ успеа да се врати во игра, 25-23.
Беше и 26-24, Кизиќ одбрани уште еднаш, но Костески не ја реализираше следната акција. Уште еден напад пропуштија битолчани за минус еден, па казната стигна преку Арнолдсен за 27-24.
На четири минути до крајот беше 29-26, а кога промашија домашните уште еден напад, Архус преку Тејгум зголеми на 30-26 и веќе немаше назад за Еурофарм Пелистер.
По пет гола во битолскиот тим дадоа Хосни и Хенеберг, а крилата Кузманоски и Костески дадоа по четири погодоци. Лесјак и Кизиќ имаа по шест одбрани. Во гостинскиот тим предводник со 11 гола беше Вест Ав Тејгум.
Во следното коло, Еурофарм Пелистер гостува кај составот на Агуаш Санташ во Португалија.
ПОВРЗАНИ ВЕСТИ
