На Европското првенство за кадети, кое се одржува во престолнината на Црна Гора, Подгорица, денес се одиграа последните натпревари од главната фаза. Репрезентациите на Унгарија и Германија од групата А и репрезентациите на Шпанија и Шведска од групата Б ќе играат во полуфиналето на ова натпреварување.
Првото полуфинале го сочинуваат репрезентациите на Унгарија и Шведска, а во второто полуфинале ќе играат Шпанија и Германија. Победниците од двете полуфинални средби ќе играат во финалето и ќе се борат за златниот медал.
Актуелниот бранител на титулата, Германија имаше многу среќа во натпреварот против Португалија, кој заврши со нерешен резултат, 23:23 (11:12). Германија и Португалија имаа ист број бодови (3), но бидејќи Германија имаше гол-разлика плус пет, додека Португалија 0, германската селекција патува во полуфиналето.
Унгарија веќе од поодамна го имаше заверено пласман во полуфиналето. Денешниот натпревар против Хрватска немаше резултатско значење за Унгарија , па „коцкестите“ ја искористија опуштеноста во унгарскиот табор и дојдоа до победа од три гола разлика, 28:25 (12:13).
Од групата Б, репрезентациите на Шпанија и Шведска обезбедија место во полуфиналето. Двете репрезентации главната рунда ја завршија со две победи и си обезбедија место меѓу најдобрите четири репрезентации на кадетскиот континентален собир.
Во разигрувањето за пласман од 9 до 16 место, во првата група, Исланд славеше против Италија со 34:28 (16:15), а домаќинот, Црна Гора конечно дојде до триумф, запиша победа против Полска од три гола разлика, 30:27 (15:17). Во втората група, Франција славеше над Србија, 39:35 (22:15), додека Словенија триумфираше против Фарски Острови со 33:23 (20:13).
Црна Гора, Фарски Острови, Исланд и Словенија обезбедија опстанок и ќе играат на младинското ЕП во 2024 година, додека Франција, Полска, Србија и Италија, ќе се борат за последното место што носи опстанок. Три од овие четири селекции ќе играат на младинскиот ЕХФ шампионат во 2024 година.
ПОВРЗАНИ ВЕСТИ
