Поранешната репрезентативка на Македонија, Меги Гичева, не планира крај на играчката кариера и во претстојната сезона ќе го носи дресот на Деспина.
Искусната ракометарка, која последните интернационални ангажмани ги имаше главно на Косово, најверојатно ќе биде и тренер на клубот од Прилеп.
Гичева ќе биде задолжена за работа со помладите категориии и ќе се обиде стекнатото искуство да им го пренесе на најмладите прилепчанки.
Пионерките на Деспина во минатата сезона играа на Ф4 турнирот и завршија на трето место, додека кадетките стигнаа до четвртфиналето во својата категорија, па така Гичева ќе има полни раце работа во обидот да се повторат минатогодишните резултати, но и да се направи чекор повеќе.
38-годишната ракометарка во својата интернационална кариера го носеше дресот на поранешниот романски суперлигаш Цетате Дева, Верона од Италија, Верија од Грција, како и на косовските Приштина, Вучитрин и Феризај.
Во Македонија настапуваше за Кометал Ѓорче Петров, Еуростандард Ѓорче Петров, Кабран Амбалажа, Жито Прилеп и Гевгелија.
ПОВРЗАНИ ВЕСТИ
