Шампионот на Грција, АЕК Атина, пред почетокот на сезоната во грчкиот шампионат одлучи да ја прекине соработката со довчерашниот тренер Алексис Алванос.
На негово место дојде поранешниот тренер на Вардар и селектор на Македонија, Драган Ѓукиќ, кој до скоро ја водеше селекцијата на Израел.
Алванос тренерската функција во АЕК Атина ја презеде пред една сезона и зацртаните цели кои клубот ги имаше на домашна и европска сцена не беа целосно остварени.
АЕК Атина во минатата сезона не успеа да направи забележителен резултат во Европскиот Куп и во третото коло беше елиминиран од Алингсас. На домашна сцена ја освои само титулата.
Тимот во кој настапува и некогашниот лев бек на Еурофарм Пелистер, Стипе Мандалиниќ, пред неколку дена загуби од Олимпијакос со 26:25 во битката за Супер Куп трофејот.
Се претпоставува дека токму поразот од Олимпијакос е главната причина за заминувањето на Алванос од грчкиот шампион.
Денеска АЕК Атина во првото коло од националното првенство силите ги одмери со Пијала и славеше со гол разлика, 22-21.
ПОВРЗАНИ ВЕСТИ
