Екипата на Вардар утре го има првиот натпревар од Лигата на шампионите за оваа година. Ракометарите гостуваат во Португалија каде ќе ги одмерат силите со екипата на Порто и ова ќе биде дуел со кој се отвораат средбите од најсилното клупско натпреварување за февруари, а ќе ги има во голем број.
Пред заминувањето, својот коментар за овој дуел го имаше Гоце Георгиевски, кој сигурно ќе има што да покаже на теренот.
„Нè очекува еден тежок натпревар во Лигата на шампионите против екипата на Порто. Ова е прв меч после паузата во ова натпреварување. Познат ривал со кој игравме веќе во Скопје и на тој дуел буквално ја имавме победата в раце, но на крај примивме несреќен гол и ремизиравме. Порто е квалитетна екипа. Нас нè чека долг пат. Имаме можност да се подготвиме. Ја анализиравме нашата игра од претходниот натпревар со нив, како и нивната игра 7 на 6. На првиот дуел ја користеа многу, а мислам дека повторно ќе ја користат. Ќе бидеме подготвени и за ваква игра“, вели Георгиевски.
Ова е дуел на кој ќе треба да се поправат недостатоците од првиот натпревар кога Порто обебеди бод во последните моменти од средбата.
„На првата средба ние имавме некои грешки во нападот на првиот дуел, додека одбраната беше добра. Ќе мораме да се подобриме. Имаме згуснат календар. После ова ни доаѓаат гостувањата кај Флензбург и ПСЖ,но сега е важно да размислуваме исклучиво на Порто. Ова е важен натпревар за нас и мораме да извлечеме поволен резултат“, коментираше Георгиевски.
Натпреварот се игра утревечер од 20:45 часот.
