Екипата на Војводина од Нови Сад е новиот шампион во Европскиот Куп за натпреварувачката сезона 2022/23, откако ги доби двата дуели од финалето против Наербо.
Војводина на првиот дуел, кој беше одигран во Нови Сад, славеше убедлива победа со седум гола разлика, 30:23, додека на денешниот реванш дуел не дозволи норвешкиот тим да има било какви шанси за сензација и забележа триумф од 25:23.
Токму составот на Наербо во ланската сезона беше победник во Европскиот Куп, но за оваа сезона ќе мора да се задоволи со вицешампионското место.
За Војводина освоеното прво место во третото по ранг европско натпреварување е најголемиот успех на европска сцена.
Србија чекаше речиси 22 години нејзин претставник да освои европски трофеј, откако Југовиќ во 2001 година беше победник во споменатото натпреварување.
