Ракометарите на Вардар одработија добро прво полувреме во кое доколку беа поконцентрирани лесно можеше да имаат убава предност и од 3-4 гола разлика. Место тоа на паузата е 13:13 и тоа резултат обезбеден на пет секунди пред истекот на првите 30 минути.
Вардарци имаа одлично отворање на натпреварот. Тргнаа силно и добро во нападот, а тоа им даваше позитивен резултат на стартот од средбата. Јотиќ и Дибиров донесоа 2:0, а првиот гол за Порто дојде во 3. минута.
Веќе во 7. минута Вардар стигна до плус четири и водеше со 5:1. Ова даде убава најава за натпреварот и донесоа предност која гарантираше убава средба за „црвено-црните“. Сепак, колку беа добри првите седум минути толку беа лоши во поглед на реализацијата следните осум. До 15. минута се чекаше за следниот погодок, а во тој период домашните успеаја да израмнат на 5:5.
Лошиот период во напад беше прекинат од Вујин и Јотиќ кои помогнати од Ристовски донесоа 7:5 во 17. минута од средбата, за минута подоцна Дибиров да донесе плус три.
Работите се менуваа многу брзо. Имаше грешки на двете страни. Не се погодуваше лесно, па многу брзо се менуваше и резултатот. Вардар не искористи шанса да отиде на плус четири, па во 23. минута домашните одново израмнија овој пат на 9:9. Две минути подоцна Порто дојде и до првото водство на овој натпревар откако Бранкињо од контра донесе 11:10. Магаљаеш во 26. минута зголеми на 12:10 и веќе се забележуваше криза во играта на Вардар. Во овој период и Никола Митревски бранеше одлично така што тој беше и виновен што Порто направи пресврт.
До крајот имаше надигрување и нови добри моменти, а на пет секунди до крајот на првото полувреме Вујин погоди од средината на теренот и го постави резултатот на паузата од 13:13.
После првото полувреме најефикасен е Дибиров со четири гола, Јотиќ има три, а Вујин два погодоци. Меѓу стрелците по еднаш се запишаа Талески, Шеваљевиќ, Чупиќ и Валчак. Во редовите на Порто по четири гола имаат Соарез и Бранкињо.
