Каталонскиот гигант Барселона се чини дека претрпи најмногу штета поради Светското првенство во Египет.
Тренерот на шпанскиот тим, Чави Пасквал, покрај натрупаниот распоред во Лигата на шампионите, ќе има уште еден проблем поради повредите на дел од ракометарите.
Лука Циндриќ полека се враќа во тренажен процес по повредата на адукторот, но веројатно нема да биде форсиран следниот период.
Блаж Јанц и Тимоти Н’гесан пријавија повреди по враќањето од Египет. Словенецот има проблеми со мускулот на левата нога, додека Французинот со мускулот на десната нога.
Веројатно двајцата ќе паузираат повеќе од еден месец. Згора на се, Арон Палмарсон, кој се повреди уште пред СП нема да биде подготвен за максимални напори, па Пасквал ќе има големи проблеми во составувањето на екипата за дуелот во четврток против Веспрем.
