Ракометарите на Охрид во сабота на домашен терен, во рамки на петтото коло од Супер лигата, го пречекуваат двократниот европски шампион и актуелен шампион на Македонија, тимот на Вардар.
Капитенот на охриѓани, Крсте Андоновски, кој водел многу битки на теренот со скопскиот тим, вели дека фаворитската улога е на страната на Вардар, но на нив е да играат и доколку им се пружи шанса да ја искористат и да забележат позитивен резултат.
„Наше е да играме, и сигурно нема лесно да се предадеме. Се надевам дека ќе изиграме еден добар натпревар и ако ни се пружи шанса се надевам и дека ќе ја искористиме. Вардар не е на рамниште како што беше пред две-три сезони, но сепак има неколку искусни играчи, целата прва постава е навистина квалитетна, играчи кои имаат освојувано шампионски титули. Фаворитската улога нормално е на нивна страна, но ние играме до крај, ќе дадеме максимум и се надеваме на поволен резултат“, изјави Андоновски.
Тој шансата на охриѓани за победа ја гледа во кратката клупа на Вардар.
„Се надеваме дека тука е нашата шанса, преку брза игра да ја измориме на некој начин првата постава на Вардар и да се обидеме да извојуваме победа“, додава капитенот на охриѓани.
Натпреварот помеѓу Охрид и Вардар ќе се одигра во салата „Билјанини извори“ со почеток во 19:30 часот.
ПОВРЗАНИ ВЕСТИ
