Ако сте ракометен фан, ова мора да го имате – РАКОМЕТЕН КАЛЕНДАР ЗА 2021 ГОДИНА

Годината што измина сигурно нема да ја паметиме по резултати на нашите ракометни екипи и репрезентации. Но во 2021 година, очекуваме повеќе радости од оние што не навикнаа на тоа – ракометарите и ракометарките.

Не чекаат настапот на машката селекција во квалификациите за ЕП 2022 со Данска, Финска и Швајцарија, на женската селекција во квалификациите за бараж за СП 2021 и дуели од ЕХФ Еврокупот против Црна Гора, Словенија и Норвешка. Машката кадетска репрезентација ќе биде активна на ЕХФ шампионатот во Македонија, младинците нема да имаат акција, додека женската младинска ќе биде домаќин на ЕХФ шампионатот, а женската кадетска ќе биде дел од ЕХФ шампионат во Грузија.

Покрај натпреварите од европските купови, Лигата на шампионите и Лигата на Европа, во кои напролет ќе имаме три претставници – Вардар, Еурофарм Пелистер и Металург, тука се и дуелите од СЕХА лигата на битолчани и „црвено-црните“. На клупска сцена, тука се стандардните натпревари во Супер лигата и Женската лига, во Првата лига, како и во Купот на Македонија, плус дуелите од сите младински натпреварувања под капата на РФМ, кои се надеваме ќе се одиграат оваа сезона. Ако се оди според планот, суперлигашите, прволигашите и женските тимови би требало да стартуваат со дуелите во последните денови од февруари.

Во средината на овој месец би требало да се одиграат стартните натпревари во Купот на Македонија во машка конкуренција, вториот викенд од април ќе бидат четвртфиналните двобои, додека на средината на мај се завршните турнири во двете конкуренции. Но сепак РФМ треба да реши во каков формат ќе се игра Купот оваа сезона. Во Првата лига исто така ќе завршат дуелите во првиот викенд во јуни, а баражот за пополнување на Суперлигата ќе се одржи викендот потоа.

Ќе бидат актуелни и завршниците во сите европски купови. Круна на сезоната би требало да бидат Олимписките игри, кои ќе се одржат во Токио. На крајот на август би требало да се одржи и традиционалниот Струшки турнир, а во септември не очекува почетокот на новата сезона во сите европски купови, како и Супер Глоуб во Саудиска Арабија и во Кина. Не чека и стартот на новите сезони во македонските шампионати, како и во регионалните конкуренции. На почетокот на декември на програмата ќе биде и Светското првенство во женска конкуренција во Шпанија.

Нè очекува навистина ракометна година, со надеж дека македонските клубови и репрезентации, ќе бидат на пиедесталот кога ќе се делат трофеите во најсилните натпреварувања. Во продолжение е преглед на натпревари и првенства по месеци…