Еурофарм Пелистер го совлада Куманово со 36-23 (18-11) во Битола, во првиот натпревар од шестото коло на ракометната Суперлига. Со победата, битолчани стигнаа до 11 бода и привремено го презедоа првото место на табелата.

Гостите се држеа до 4-4 во седмата минута, но Еурофарм Пелистер потоа почна да ја гради предноста. Филип Кузмановски и Рудолф Хакбарт беа во прв план при водството од 9-5, а во 18. минута домаќините веќе имаа шест гола разлика, 12-6. На паузата заминаа со 18-11.

Битолчани не го намалија темпото ни по одморот. Во 38. минута Петар Атанасијевиќ погоди за прва двоцифрена предност, 22-12. Куманово не успеа да ја доведе победата во прашање, а Пелистер во 55. минута стигна и до највисоките плус 14, 34-20. Мечот заврши со 36-23.

Филип Кузмановски беше најефикасен кај победникот со седум гола. Атанасијевиќ постигна шест, Хакбарт пет, а Цветан Кузманоски и Малик Татар по четири. За Куманово, Наум Костов постигна осум гола, додека Бојан Гичев и Омар Солиман Радван додадоа по пет.

По овој меч Пелистер има 11 бода од шест натпревари. Вардар и тимот од Автокоманда имаат по 10 бода од пет средби и допрва треба да ги одиграат натпреварите од шестото коло. Куманово останува на еден бод од шест меча.

▶▶▶ Приклучи се на VIBER – https://abit.ly/viber-24rakomet
Добивај директно РАКОМЕТНИ ВЕСТИ на твојот мобилен телефон 📲.
Со еден клик до сите вести. 🤾

Екипата на Мелсунген направи голем чекор напред кон првите две позиции во групата и пласман во ТОП 12 во Лигата на шампионите, откако славеше против Нант со 28-23, па сега е хаос во битката за врвот. Мелсунген, Нант и Висла Плоцк имаат по четири бода, а Вардар е последен без бодови.

По 4-4 на стартот, Мелсунген почна да се одлепува и отиде на плус три, 7-4, а гостите цело време бркаа негатива. На паузата тимот на Парондо водеше со 14-11, но на десетина минути до крајот Нант преку Турна израмни на 20-20.

Тука беше клучниот период. Симиќ беше одличен на голот на Мелсунген, Нант почна да греши и шест гола по ред постигнаа домашните за 27-21, па славјето можеше да почне. Симиќ запиша 17 одбрани, а Дростен даде шест гола за победничкиот тим, додека Турна постигна исто толку за Нант.

Барселона одработи рутински против Динамо Букурешт и одигра колку што треба за да ги освои бодовите, 34-27. Голманот Ернандез блескаше на голот на Барса и запре 19 удари на романскиот шампион. Мем даде шест гола, а Гомез уште пет, додека Вујовиќ постигна седум за поразениот состав.

Скандерборг Архус го победи Монпелје со 36-32 и ќе биде интересна трката во оваа група за втората позиција, која води во ТОП 12 фазата. Гостите парираа во првиот дел, водеа во повеќе наврати, но до паузата данскиот состав предводен од голманот Петерсен со 20 одбрани направи пресврт, ја презема контролата и до крајот не ја испушти предноста.

Јохан Хансен беше стрелец на осум гола за победничкиот тим, додека шест за Монпелје постигна Паскал. На табелата во оваа група Барса има шест бода, Архус има три, Монпелје два, а Динамо Букурешт еден.

Гледајте ВО ЖИВО, Вардар – Висла Плоцк, ТУКА* / ТУКА**

*линковите се активни половина час пред мечот
**ЕХФ ТВ работи со претходна регистрација и претплата
***преносот во Македонија може да го следите на Арена Спорт Македонија

Европската ракометна федерација ги делегираше официјалните лица за натпреварите од 3 коло во Лигата на шампионите во машка конкуренција.

Ракометарите на Вардар го пречекуваат полскиот вицепрвак Висла Плоцк во најважниот натпревар, на кој само со победа ќе ги продолжат надежите за ТОП 12 во најелитното европско клупско натпреварување.

ЕХФ за овој меч ги делегираше браќата близнаци од Молдавија – Алексеј и Игор Ковалчук, додека делегат ќе биде Црногорецот Предраг Павичевиќ.

Натпреварот меѓу Вардар и Висла Плоцк се игра утре во СЦ „Јане Сандански“ со почеток од 20:45 часот.

Иван Чупиќ е задоволен од развојот на младите ракометари кои тренираат со првиот тим на Вардар.

Тројцата талентирани играчи – Николче Нечовски, Бобан Поповски и Марко Ѓорчески, веќе ја почувствуваа атмосферата во „Јане Сандански“, патувањата и настапите со сениорската екипа, но тренерот смета дека допрва треба да добиваат поголема минутажа.

„Сите тројца работат многу добро. Физички и тактички се подготвени и се гледа дека добро се вклопија во тимот. Нормално е во овој момент да постои разлика во квалитетот во однос на поискусните ракометари, но им недостига уште индивидуална работа. Тоа што тренираат со првиот тим, гледаат видеа, патуваат и играат пред полна сала сигурно ќе им донесе големо искуство“, истакна Чупиќ.

Неговата желба е младите ракометари да не останат само дел од тренинзите на првиот тим, туку редовно да играат и натпревари.

„Кога нема да играат за првиот тим, мора да настапат за вториот тим. По една добра работна недела со сениорите, на крајот од неделата мора да имаат натпревар. Младиот ракометар не смее времето да го поминува само на видео анализа, во сала за вежбање и во подготовка за следниот натпревар. Нему му е потребен посебен процес и индивидуална работа.“

Чупиќ верува дека тројцата млади играчи имаат иднина во Вардар, а клубот ќе покаже трпение во нивниот развој.

„Вардар нема многу трпение кога се во прашање резултатите, што е нормално за клуб од ваков ранг. Но, ние како стручен штаб и клуб имаме трпение за младите и веруваме во нив. За две или три години, со добра работа и ако останат цврсто на земја, ќе добијат можност да играат за Вардар.“

Стратегот на „црвено-црните“ објасни и како се гради вистинскиот клупски идентитет.

„Кога ќе донесете дете на 16 или 17 години, по три сезони тоа дете е вардарец. Ако донесете македонски ракометар на 25 или 28 години, тој ќе игра, ќе помогне и ќе ја зема својата плата, но никогаш нема да биде вардарец на ист начин. Затоа сакаме да ја зголемиме базата на деца и базата на вардарци“, порача Чупиќ.