Струга од 12 до 15 авгиуст повторно ќе живее со ракометот, а покрај Црн Дрим ќе се одржи вистински ракометен фестивал исполнет со добри натпревари, полни трибини и незаборавна атмосфера. 24Ракомет и годинава е медиумски партнер на турнирот, а во пресрет на неговиот почеток ќе ги претставиме сите екипи учесници и ќе пренесеме интересни приказни, факти и детали од богатата историја на турнирот. Сите натпревари ќе бидат пренесувани во живо на YouTube каналот на 24Ракомет.
Прилеп ќе го искористи турнирот во Струга како прва сериозна проверка во подготовките за новата сезона. Капитенот Димитар Димитриоски очекува силни натпревари против Бутел и против Вардар, а целта на прилепчани е да се воиграат и да покажат дека се подготвени за борба за место во плеј-офот. Прилепчани со најдобриот стрелец во лигата од лани доаѓаат во Струга.
Струга од 12 до 15 август повторно ќе живее со ракометот. На отвореното игралиште покрај Охридското Езеро ќе се одржи 54. издание на Меѓународниот ракометен турнир „Вангел Баљукоски – Баљук“. 24Ракомет и годинава е медиумски партнер на турнирот, а сите натпревари ќе бидат пренесувани во живо на YouTube каналот на 24Ракомет.
Меѓу шесте учесници ќе биде и Прилеп, кој во Струга ќе ги одигра првите контролни натпревари во летните подготовки. Ракометарите на Прилеп се наоѓаат во тежок дел од подготовките, кога акцентот е ставен на физичката работа. Димитриоски е свесен дека екипата сè уште нема да биде во најдобрата форма, но токму поради тоа натпреварите во Струга ќе бидат важни за стручниот штаб.
„За нас како тим, турнирот пред сè ќе биде одлична проверка за тоа како сме работеле досега. Знаеме дека во овој период нозете сè уште се тешки, но ова ќе биде и одлична можност играчите што досега не настапувале во Струга да ја почувствуваат магијата на турнирот“, вели Димитриоски.
Прилеп подготовките ги започна на крајот на јули, а дуелите покрај езерото ќе бидат првата можност тренерот Наум Танески да види како функционира обновениот состав во натпреварувачки услови.
Димитриоски се враќа со убави спомени
Капитенот на Прилеп веќе настапувал на турнирот во Струга. Како ракометар на Металург имал можност да ја почувствува атмосферата на отвореното игралиште, која, според него, не може да се спореди со натпреварите во сала.
„За моја среќа, сум имал можност да настапам на турнирот со екипата на Металург. Тоа е драгоцено искуство за секој играч, без разлика на возраста, бидејќи не се добива често можност да се игра под отворено небо и пред публика што многу добро го познава ракометот“, истакнува Димитриоски.
Тој смета дека традицијата е главната причина поради која турнирот во Струга има посебно место во македонскиот ракомет.
„Ова е најстариот и најдобриот турнир во Македонија. Станува збор за традиција што трае со децении и се надевам дека уште долго ќе продолжи“, додава капитенот на Прилеп.
Бутел ќе трча, а Вардар е најсилниот тест
Прилеп ќе игра во група со Бутел и со Вардар. Според Димитриоски, двата натпревари ќе понудат различни предизвици и ќе бидат многу корисни за екипата во овој дел од подготовките.
Бутел влегува во новата сезона со подмладен состав и со Стојанче Стоилов на тренерската позиција. Димитриоски очекува динамичен натпревар со многу трчање.
„На турнирот нема лесни и тешки противници. Бутел има доста млад состав и е предводен од Стојанче Стоилов, па очекувам динамичен и тркачки натпревар“, вели Димитриоски.
Уште поголем предизвик ќе биде натпреварот против Вардар, кој во Струга доаѓа како освојувач на двојната круна и со значително засилен состав.
„Би рекол дека за наша среќа сме во група и со главниот фаворит за освојување на турнирот, но и за титулите во првенството и Купот на Македонија. Ќе имаме одлична можност да го дадеме максимумот и да се бориме до крај против РК Вардар. Натпреварите против противник од таков калибар се драгоцени за понатамошниот тек на подготовките и за стартот на првенството“, истакнува капитенот.
Прилеп и минатата сезона покажа дека може да биде незгоден противник, а во новата натпреварувачка година целта е екипата да направи чекор напред и да се врати во плеј-офот.
Прилеп доаѓа во полн состав
Добра вест за стручниот штаб е што Прилеп треба да настапи со сите расположливи ракометари. Тоа ќе му овозможи на Танески да ја распореди минутажата и да испроба повеќе комбинации.
„Нашата екипа доаѓа во полн состав, подготвена за борба и докажување, со желба да оствариме што подобар пласман“, порача Димитриоски.
Во Прилеп летово пристигнаа четворица нови ракометари – голманот Благојче Трајкоски, левиот бек Андреј Стојановски, повратникот Стефан Лозаноски и пикерот Петар Маркоски. Трајкоски треба да донесе дополнителна сигурност на голот, Стојановски пристигна од Пролет, Лозаноски се врати по интернационалните настапи во Грција, додека Маркоски треба да ја зголеми конкуренцијата на пивотменската позиција.
Вардар е фаворит, Охрид сè посилен
Димитриоски нема дилема околу главниот фаворит за освојување на турнирот. Според него, најголеми шанси има Вардар, но очекува силен настап и од Охрид.
„Според мене, главен фаворит е Вардар. Од друга страна, тука е и Охрид, кој од година во година расте. Очекувам оваа сезона да биде многу неизвесна до самиот крај“, смета Димитриоски.
Вардар и Охрид зад себе имаат сезона во која ги освоија трите најважни трофеи. Скопскиот тим стана шампион и го освои Купот на Македонија, додека Охрид триумфираше во ЕХФ Европскиот куп.
Двете екипи играа и во финалето на Купот, а по квалитетот на составите се меѓу најсериозните кандидати повторно да се сретнат во финалето во Струга.
Плеј-оф и борба на секој натпревар
Прилеп во минатата сезона беше најдобрата екипа во плеј-аут конкуренцијата, но во новата сезона амбициите се поголеми. Целта е пласман во плеј-офот, а потоа и борба за место во европските купови.
Димитриоски, кој минатата сезона беше најдобар стрелец во Супер лигата, повторно ќе биде еден од главните адути на екипата. Искусниот капитен очекува борба на секој натпревар и поголема поддршка од прилепската публика.
„Нашата цел во првенството е јасна – пласман во плеј-офот и борба до последната капка пот на секој натпревар. Прилепската публика заслужува врвен спорт и полна сала. Се надеваме дека салата ќе биде средена во најбрз можен рок, а тогаш слободно можам да кажам дека никој нема лесно да освојува бодови во Прилеп“, заврши Димитриоски.
ПРИЛЕП – клупски информации
Состав
Голмани: Благојче Трајкоски, Никола Стојкоски, Иван Ангелески
Играчи: Димитар Димитриоски, Денис Шабановиќ, Марио Столески, Владан Кастратовиќ, Никола Цветаноски, Андреј Стојановски, Стефан Лозаноски, Филип Адамчески, Никола Шипинкоски, Александар Тренчески, Петар Маркоски, Михаил Седлоски, Бобан Вренцоски, Андреј Бошкоски, Бојан Стојкоски, Драган Тутески, Дамјан Талески и Ангел Крстески
Стручен штаб: Наум Танески, Менде Петлески, Ѓоко Божиноски, Кристи Шокоски и Рубинчо Седлоски.
Играчи што дојдоа
Благојче Трајкоски, Андреј Стојановски, Стефан Лозаноски, Петар Маркоски, Никола Стојкоски
Играчи што заминаа:
Илчо Ивчески, Божидар Илиески, Томислав Квастек, Пеце Рајатоски
Распоред на мечевите на Прилеп во Струга
12 август
18,30 часот Вардар – Прилеп
13 август
18,30 часот Прилеп – Бутел
15 август
Натпревар за пласман
* СИТЕ НАТПРЕВАРИ ЌЕ БИДАТ ПРЕНЕСУВАНИ НА YOUTUBE КАНАЛОТ НА 24РАКОМЕТ
❗❗ Следете не на нашите социјални мрежи, на Facebook, и на Instagram и бидете дел од Viber заедницата на 24Ракомет – добивајте ги сите информации веднаш на вашиот телефон…
