Саду Н’танзи е нов ракометар на Еурофарм Пелистр. 26-годишниот Французин треба да ја засили конкуренцијата на позицијата среден бек. Тој веќе беше во Македонија на почетокот на септември, како што објави 24Ракомет и тогаш ги договори сите детали околу договорот.

Нтанзи потекнува од школата на Пари Сен Жермен, а во францускиот гигант го направи и првиот голем чекор во сениорската кариера. Беше дел од повеќе трофејни сезони на ПСЖ и настапуваше во Лигата на шампионите.

Во кариерата играше и за Тулуз, Татабања и катарски Ал Араби. Во текот на минатата сезона беше ангажиран и од германски Мелсунген, каде пристигна на позајмица како решение за проблемите со повредени ракометари.

Французинот е висок 183 сантиметри и покрај организирањето на нападот може да понуди брзина, игра „еден на еден“ и дополнителна опасност кон противничкиот гол.

По пет години ракометарките на Вардар повторно играа европски меч и одиграа одлично прво полувреме, во кое младите македонски ракометарки имаа предност од 16-15 протрив италијански Бриксен. Сепак на крај домашните победија со 32-29. Македонскиот тим утре ќе има можност да ја надомести негативата во реваншот.

Вардар одигра храбро прво полувреме. Бриксен поведе со 8-7, но избраничките на Даниела Новеска одговорија со четири гола во низа и во 18. минута стигнаа до 11-8. Домаќинките се вратија до 14-14, а Анастасија Тодоровска во последната минута погоди за предност на Вардар од 16-15 на паузата.

Пресвртот се случи веднаш по одморот. Бриксен го отвори второто полувреме со серија од 4-0 и за помалку од три минути го смени водството во своја корист, 19-16. Вардарките не дозволија противникот да се одлепи: со три последователни гола израмнија на 19-19, а потоа останаа во игра до 22-22 во 44. минута. Во тој период Бриксен остана без Мара Хабихер, која доби црвен картон, а Ања Лашкоска погоди од седум метри за 21-21.

Клучен за исходот беше следниот налет на италијанскиот состав. По голот на Ивана Трифуноска за 24-23 во 49. минута, Вардар не постигна гол во наредните пет и пол минути. Бриксен направи серија од 4-0 и поведе со 28-23. Голманката Франческа Лучин имаше важни одбрани во завршницата и го спречи македонскиот тим повторно да се доближи.

Домаќинките стигнаа и до пет гола предност, но Вардар до крајот ја намали негативата на три. Леона Миленкоска беше најефикасна на натпреварот со десет гола од 11 обиди, од кои четири од четири од седум метри. За Вардар по четири пати погодија Лашкоска, Анастасија Тодоровска и Трифуноска. Кај Бриксен, Сара Хилбер постигна девет гола, а Мари Ајхнер, Виолета Вењи и Џада Бабо по пет.

Лучин го заврши мечот со 11 одбрани. На голот на Вардар, Вероника Ѓорѓиевска имаше седум, а Марија Галачева две одбрани, меѓу нив и одбранет седмерец во првото полувреме.

Реваншот се игра в сабота од 18 часот, повторно во Бриксен. Вардар формално ќе биде домаќин на вториот натпревар и ќе тргне по надоместување на трите гола негатива.

▶▶▶ Приклучи се на VIBER – https://abit.ly/viber-24rakomet
Добивај директно РАКОМЕТНИ ВЕСТИ на твојот мобилен телефон 📲.
Со еден клик до сите вести. 🤾

Тимот на Аполда, каде што тренер е Игор Тоскоски, ја запиша четвртата победа во пет меча досега од новата сезона во Регионалната лига на Германија.

По триумфот над Ашерслебен на домашен терен, Аполда славеше на уште една средба дома, овојпат над Хале со 36-32.

Во Аполда на Тоскоски играат голманот Александар Стојаноски, пивотот Пеце Ѓорѓиески, левиот бек Христијан Милошески и десниот бек Дејан Гошевски.

На средбата со Хале, Стојаноски имаше одлична партија на голот со 13 одбрани, Гошевски беше најдобар стрелец со 15 гола, додека Ѓорѓиески додаде еден, а Милошески ја пропушти оваа средба.

Младост Богданци освои важен бод на гостувањето кај „витамините“ од Автокоманда, откако одигра реми, 21-21, во меч од 5 коло во Супер машката лига.

Иако домашните водеа на осум минути до крајот, 21-19, сепак гостите од Богданци покажаа карактер, се вратија во егал и го одбранија последниот напад на „витамините“.

Во израмнетиот дуел на двата тима кои летово обезбедија пласман во елитното друштво, Младост Богданци успеа да остане во игра до самиот крај и да се избори за бод,.

„Витамините“ во последните десетина минути двапати имаа плус два, а при резултат 21-20 добија и предност од ракометар повеќе, како и седмерец. Сепак, домаќините не го искористија периодот во кој можеа да го решат натпреварот.

Младост Богданци ја искористи својата шанса и успеа да израмни на 21-21, со што го врати натпреварот во неизвесност. Во последниот напад домашниот тим имаше можност да стигне до победата, но обидот на Џигероски заврши над голот, па бодовите беа поделени.

Кај домашните најефикасни беа Трајкоски со пет и Ѓоргиевски со четири гола, додека голманот Јорданов имаше 15 одбрани. Младост Богданци го предводеше Бојаниќ со осум погодоци, а Андоновски постигна седум.

Двата тима остануваат без победа по пет кола, и својата шанса ќе ја бараат на следните средби.

Македонскиот вицепрвак Чаир ја запиша третата сезонска победа во Супер женската лига, откако славеше против Ѓорче Петров 2 со убедливи 38-27.

Нерешено беше само на стартот, 1-1, а потоа во најголем дел домаќинките ја контролираа играта и резултатот.

Чаир водеше по првиот дел со 17-15, но веднаш на стартот на вториот дел се одлепи на плус пет, 20-15.

Гостинките не се откажуваа од бркање на негативата, во еден момент намалија на минус два, 25-23, но немаа сили за нешто повеќе.

Чаирчанки „нагазија“ во последните петнаесетина минути и комплетно го надиграа ривалот за конечни 38-27.

Ѓорѓиевска даде 12 гола за Чаир, а Махмуд стрелаше осум пати, додека Анчева со осум и Mркиќ Стојанов со седум беа најефикасни кај Ѓорче Петров 2.