Средниот бек на Ѓорче Петров 2, Марија Анчева, го доби признанието за најкорисен играч, односно МВП за месец септември во Супер женската лига.

Анчева играше одлично во првите три средби од оваа сезона во новиот клуб, во кој заедно со искусната Савица Мркиќ Стојанов, се од голема помош на младите „лавици“.

Таа освои 72% од гласовите на анкетата, додека второпласирана беше Стефанија Ѓорѓиевска од Чаир која освои 8% од гласовите.

Номинирани за МВП за месец септември во Супер женската лига беа уште и Анастасија Николовска од Спартак, Емилијана Ризоска од Ѓорче Петров и Леона Миленкоска од Вардар.

Тимот на Металопластика, каде што игра македонскиот интернационалец Дејан Кукуловски, бележи одлични резултати во српскиот шампионат.

Металопластика славеше на гостувањето кај Дубочица Лесковац со 31-26 во натпревар од 6 коло во првенството на северниот сосед.

Заедно со Павловиќ и голманот Чировиќ, Кукуловски беше меѓу најдобрите поединци на теренот и успеа да постигне пет гола во противничката мрежа.

Металопластика е прва на табелата со 11 бодови по шест меча, додека Партизан е втор со десет бода, но и натпревар помалку.

Ракометарите на Бутел Скопје вечерва од 18:00 часот ќе го одиграат првиот натпревар во ЕХФ Европскиот Куп на гости кај хрватската Горица.

Станува збор за незгоден ривал, кој има одличен старт во Хрватска – шест победи на шест меча, меѓу кои и онаа над Сесвете, учесник во Лигата на Европа и тоа на гостински терен.

Десното крило Максимилијан Гуриќ очекува тежок натпревар.

„Во Европскиот куп го пречекуваме Бутел Скопје, млада македонска екипа во чии редови има искусни поединци. Нè очекува тежок противник и натпревар во кој ништо нема да добиеме без борба. Во овој густ распоред важно ни е добро да го отвориме дуелот и да покажеме дека никој не поминува лесно низ нашата сала. Затоа ги повикуваме сите навивачи: дојдете, исполнете ги трибините и подгответе им на гостите што е можно потешка атмосфера. Вие сте нашиот осми играч“, порача десното крило.

Тренерот на Горица, Матеј Мишковиќ, вели дека Бутел Скопје заслужува целосен респект.

„Пред нас е голем европски натпревар и предизвик на кој сите во клубот исклучително му се радуваме. Ни гостува Бутел од Скопје, квалитетна и сериозна екипа која заслужува целосен респект. Свесни сме дека нè очекува тежок натпревар против противник кој има квалитет и амбиции. Сепак, ние имаме свои цели и веруваме во она што го работиме. Од почетокот на сезоната градиме победнички менталитет, а ваквите натпревари се можност да покажеме колку вредиме и колку можеме да постигнеме како тим. Сакаме да бидеме храбри, одлучни и да го наметнеме нашиот начин на игра од првата минута. Играме на домашен терен, пред нашите навивачи, и немаме намера никому да му ја препуштиме улогата на фаворит, без оглед на името на противникот.
Го почитуваме Бутел, но веруваме во сопствениот квалитет. Нашата цел не е само да учествуваме во европското натпреварување, туку да бидеме конкурентни, да победуваме и да направиме исчекор на европската сцена со Горица“, заврши Мишковиќ.

Ракометарите на Охрид по триумфот над тимот на Кирил Лазаров, ќе играат и против втората екипа од Автокоманда.

„Витамините“ досега немаат триумф во елитната конкуренција, па „гладијаторите“ се големи фаворити за бодови против составот на Никола Матлиески.

За избраниците на Борис Ројевиќ ова ќе биде последен тест пред двомечот од ЕХФ Европскиот Куп наредниот викенд.

Покрај овој дуел на домашна сцена, има и една средба од Супер женската лига, во која Чаир ќе игра против Пелистер.

Во прволигашката конкуренција, ќе има двојна програма во Гостивар – најпрво момците на Јехона ќе играат против Пролет, а потоа дамите ќе се соочат со Овче Поле СУ.

Македонија Ѓорче Петров по поразот од Драчево Јуниор, ќе бара враќање на победничките патеки против составот на Шампион.

ДЕНЕСКА НА ТЕРЕНИТЕ:

14:30 ПЕЛИСТЕР – ЧАИР (МАКЕДОНИЈА)
15:00 ЈЕХОНА – ПРОЛЕТ (МАКЕДОНИЈА)
16:00 МУЛТИ ЕСЕНС – ОХРИД (МАКЕДОНИЈА)
16:00 МАКЕДОНИЈА ЃОРЧЕ ПЕТРОВ – ШАМПИОН (МАКЕДОНИЈА)
17:15 ЈЕХОНА – ОВЧЕ ПОЛЕ СУ (МАКЕДОНИЈА)

Овче Поле СУ продолжува со одличните настапи во Првата лига, откако во натпревар од 5 коло славеше убедлива победа на гостувањето кај Јехона во Гостивар со 51-14.

Гостинките уште од самиот почеток ја наметнаа својата игра и покажаа дека се големи фаворитки против младиот состав на Јехона.

Овче Поле СУ поведе со 16-1 за 17 минути игра, а до крајот на натпреварот постигна уште 35 погодоци за убедлив триумф.

Најефикасни во победничкиот состав беа Анастасија Сентовска и Јована Ангеловска, кои постигнаа по десет гола. Во редовите на Јехона, Алтина Хасани се истакна со седум погодоци.

Со оваа победа, Овче Поле СУ останува на врвот на табелата со максимални десет бода по пет одиграни кола.