Ракометарките на Ѓорче Петров 2 по поразот од Вардар ја запишаа првата победа во Супер женската лига во новата сезона.

Избраничките на Милева Велкова славеа на гостувањето кај Пелистер со 31-23, откако направија пресврт во последните петнаесетина минути.

Битолчанки поведоа со 5-1, па 7-3, но на сцена стапија искусните Марија Анчева и Савица Мркиќ Стојанов, па Ѓорче Петров 2 израмни до паузата на 13-13.

Во вториот дел домашните водеа до 44 минута кога беше 19-18, а потоа огромен пад и грешки, кои „лавиците“ ги казнија и за десет минути отидоа на 26-19, па прашањето околу победникот беше решено.

Марија Анчева и Савица Мркиќ Стојанов со по седум гола беа најдобри во победничката екипа, а шест гола додаде Мирјана Наумоска. Кај битолчанки се истакна Еџе Сејадин со седум погодоци.

Црногорскиот шампион Ловќен продолжува со засилувањето на ростерот, а најново име во составот од Цетиње е српскиот голман Предраг Мијатовиќ.

Станува збор за 24-годишен чувар на мрежата, висок 194 сантиметри, кој своевремено дојде како голем талент во Металург.

Новиот чувар на мрежата на Ловќен во последните две сезони го бранеше голот на Динамо Панчево, а претходно освен за Металург, настапуваше за Партизан и францускиот Екс Ан Прованс.

Беше репрезентативец на Србија во младинските категории, а сега ќе го брани голот на Ловќен, кој е ривал на Еурофарм Пелистер во Регионалната лига.

Ловќен претходно го ангажираше и десниот бек Мохамед Ал Азари, кој минатата сезона играше за Тиквеш.

▶▶▶ Приклучи се на VIBER – https://abit.ly/viber-24rakomet
Добивај директно РАКОМЕТНИ ВЕСТИ на твојот мобилен телефон 📲.
Со еден клик до сите вести. 🤾