Европската ракометна федерација ги делегираше официјалните лица за натпреварите од второто коло во ЕХФ Европскиот Куп.

Покрај судиите Илиевски, Македонија на европската сцена ќе ја претставува и делегатот Ацо Николовски.

Тој беше делегат на два меча од женскиот ЕХФ Куп минатиот викенд на Косово, каде играа Феризај и ВИФ од Фарски Острови, а сега ќе има двојна задача и во машкиот ЕХФ Купот.

Денеска Николовски ќе биде делегат на пресметката меѓу турскиот Бешикташ и Фиверс Маргаретен од Австрија во Истанбул што ќе започне од 16:00 часот.

Утре Николовски ќе биде задолжен за се да мине во најдобар ред на дуелот меѓу Бурса и норвешкиот Рунар Сандефјорд што се игра во Бурса и ќе стартува од 16:00 часот.

Денеска во центарот на вниманието на македонската јавност ќе биде настапот на Бутел Скопје во ЕХФ Европскиот Куп и гостувањето кај хрватската Горица.

Бутелци под водство на Стојанче Стоилов се подготвени за предизвикот на меѓународна сцена против тимот што има одличен старт на сезоната во хрватскиот шампионат, шест победи на шест меча, а една против учесникот во ЛЕ – Сесвете и тоа на гостински терен.

Мечот меѓу Горица и Бутел Скопје се игра вечерва од 18:00 часот во градската сала во Велика Горица.

Покрај мечот на Бутел Скопје, интересен ќе биде и дуелот од Регионалната лига кај дамите меѓу шампионот Ѓорче Петров и српскиот Бор, кој се игра во салата „Кочо Рацин“ од 18:00 часот. „Лавиците“ со триумф ќе се вклучат во битка за првото место во групата Б од регионалната конкуренција.

Освен двата меча на македонските преставници на меѓународна сцена, на домашна сцена актуелни се натпреварите од Супер лигата во машка и женска конкуренција, како и од Првата лига во двете конкуренции.

Кај мажите, интересно ќе биде во Куманово, каде гостува Младост Богданци, додека вицепрвакот Еурофарм Пелистер ќе игра на гости кај Прилеп и ќе биде фаворит за нови бодови.

Во прволигашката конкуренција ќе се одигра дербито меѓу Аеродром и Драчево Јуниор, а ќе има и регионален двобој меѓу Радовиш и штипски Текстилец.

ДЕНЕСКА НА ТЕРЕНИТЕ:

18:00 ЃОРЧЕ ПЕТРОВ – БОР (РЕГИОНАЛНА ЛИГА)
15:00 ДЕСПИНА – СПАРТАК (МАКЕДОНИЈА)
17:00 АТЛЕТИК – ВАРДАР (МАКЕДОНИЈА)
19:00 ГЕВГЕЛИЈА ЈУГ – АСТИБО (МАКЕДОНИЈА)
19:30 ШАМПИОН – СТРУЖАНКА (МАКЕДОНИЈА)
18:30 ПРИЛЕП – ЕУРОФАРМ ПЕЛИСТЕР (МАКЕДОНИЈА)
16:30 КУМАНОВО – МЛАДОСТ БОГДАНЦИ (МАКЕДОНИЈА)
19:00 АЛКАЛОИД – ФЕРЛАХ (ЕХФ КУП)
18:00 ГОРИЦА – БУТЕЛ СКОПЈЕ (ЕХФ КУП)
18:30 ВАРДАР НЕГОТИНО – ПАРТИЗАН ГЕВГЕЛИЈА (МАКЕДОНИЈА)
18:00 РАДОВИШ – ТЕКСТИЛЕЦ (МАКЕДОНИЈА)
19:00 ОВЧЕ ПОЛЕ – ПРЕСПА (МАКЕДОНИЈА)
19:00 ИЛИНДЕН – СОКОЛ САСА (МАКЕДОНИЈА)
17:00 АЕРОДРОМ – ДРАЧЕВО ЈУНИОР (МАКЕДОНИЈА)

Вардар губи со 16-13 на гостувањето кај Висла Плоцк по првото полувреме од натпреварот во Лигата на шампионите. Домаќините во еден момент имаа осум гола предност, но македонскиот тим успеа да се врати во игра пред паузата.

Висла го постигна првиот гол, а Вардар по почетните израмнувања поведе со 3-2. Следуваше период во кој резултатот остана тесен. Во 11. минута беше 5-5, но токму тогаш полскиот тим ја направи првата голема серија – пет гола во низа за водство од 10-5.

Вардар ја прекина серијата, но не успеа веднаш да го запре налетот на домаќините. Висла стигна до 14-6 во 21. минута, што беше нејзината највисока предност во првото полувреме. „Црвено-црните“ намалија на 14-8, а по водството на домаќините од 15-8 ја одиграа својата најдобра резултатска делница.

Вардар постигна три гола во низа за 15-11. Висла возврати со гол за 16-11, но последните два погодоци во полувремето беа на гостите. Така, од негатива од седум гола во 25. минута, Вардар на пауза замина со достижни 16-13.

▶▶▶ Приклучи се на VIBER – https://abit.ly/viber-24rakomet
Добивај директно РАКОМЕТНИ ВЕСТИ на твојот мобилен телефон 📲.
Со еден клик до сите вести. 🤾

Веселин Вујовиќ не е повеќе селектор на репрезентацијата на Катар, откако двете страни не успеаја да постигнат договор за продолжување на соработката.

Иако црногорскиот стратег неодамна оствари голем успех со катарската селекција, освојувајќи сребро на Азиските игри во Јапонија, преговорите за нов договор не завршија успешно.

Вујовиќ минатата пролет повторно седна на клупата на Катар, наследувајќи го францускиот стручњак Валери Ривера. Ова беше негов втор мандат со катарската репрезентација, откако претходно ја предводеше и на Светското првенство во 2025 година во Хрватска.

Главната причина за разделбата се несогласувањата околу условите и времетраењето на новиот договор. Вујовиќ очекувал соработката да продолжи до мај, вклучувајќи ги и квалификациите за Олимписките игри во Лос Анџелес во 2028 година, додека катарската федерација понудила договор до крајот на СП во јануари.

Некогашниот селектор на Македонија, Словенија, Иран, Црна Гора…сега е слободен во потрага по нов ангажман.

По 15 години минати низ некои од најголемите европски клубови, Кент Робин Тонесен се враќа дома. Норвешкиот репрезентативец од летото 2027 година повторно ќе го носи дресот на Фјелхамер, клубот во кој започна неговата ракометна приказна.

Трансферот сега е и официјално потврден. Тонесен потпиша двегодишен договор како играч, а истовремено ќе добие и постојано работно место во клубот како координатор за маркетинг и спорт.

„Сите што ме познаваат знаат колку многу ми значи Фјелхамер. Да се вратам и да му дадам нешто назад на клубот многу ми значи“, изјави Тонесен за ТВ2.

За 35-годишниот леворак бек ова ќе биде затворање на еден огромен европски круг. Од Норвешка замина во 2012 година, а потоа настапуваше за Савехоф, Вецлар, Фуксе Берлин, Веспрем, ПИК Сегед, ПСЖ и Флензбург. Со Веспрем и Сегед освојуваше титули во Унгарија, а со ПСЖ стана шампион на Франција во 2024 и 2025 година.

Иако заминува од врвниот европски ракомет, Тонесен потенцира дека враќањето во Фјелхамер не го гледа како мирно пензионирање.

„Не се враќам за да успорам. Сакам да придонесам на теренот и да бидам важен играч за тимот“, порача Норвежанецот.

Во Фјелхамер очекуваат неговото влијание да биде многу поголемо од она што ќе го покаже на натпреварите. Клубот сака да го користи огромното искуство што го стекна во најсилните европски првенства и во Лигата на шампионите, особено во работата со младите ракометари. Тренерот Кристијан Близнак, кој во минатото беше и соиграч на Тонесен во Вецлар, смета дека неговото присуство ќе биде исклучително значајно за развојот на клубот.

Враќањето дома доаѓа и по еден многу тежок период за искусниот бек. За време на летниот одмор во Хрватска, Тонесен доби херпес зостер во пределот на лицето и окото. Состојбата беше толку сериозна што во еден момент постоеше и страв за неговиот вид, а самиот подоцна откри дека првите три недели биле исклучително тешки.

Во меѓувреме се врати на тренинзите и повторно почна да игра, а за ТВ2 порача дека сега состојбата е добра. Сето тоа дополнително влијаело на одлуката да се врати во Норвешка со семејството.

Тонесен зад себе има и богата репрезентативна кариера. За Норвешка одигра 148 натпревари и постигна 360 голови, а со националниот тим освои сребрен медал на Светското првенство во 2017 година. Последниот голем турнир на кој настапи беше Светското првенство во 2025 година.

▶▶▶  Добивај директно РАКОМЕТНИ ВЕСТИ на твојот мобилен телефон
Приклучи се на VIBER – https://abit.ly/viber-24rakomet . Со еден клик до сите вести.