Женската репрезентација на Македонија загуби со 35-27 од Германија во натпреварот од 5 коло во квалификациите за пласман на ЕП 2026. Со поразoт Македонија и натаму останува во игра за место на континентален собир, но ќе се брои гол-разликата по последното коло, не само нашата туку и на конкурентите – третопласираните во другите групи, под услови Белгија вечерва да загуби од Словенија.

Девојките на Кристијан Грчевски храбро се бореа, но немаа сили за нешто повеќе против бундес тимот, кој без оглед на максималниот биланс по четири кола, не сакаше да дозволи никакво изненадување на овој меч.

Со победа кај Белгија, Словенките ќе обезбедат пласман на ЕП и во последниот меч против нас ќе влезат без притисок. Германија е прва на табелата со десет бода, Словенија втора со четири, но и меч помалку, додека Македонија е трета со два, пред Белгија која има исто толку и натпревар помалку. На ЕП 2026 пласман ќе обезбедат и најдобрите четири третопласирани селекции од шесте групи. Македонија во моментов има гол-разлика од – 32.

Гостинките отворија со водство од 2-0, па 4-2, пред голманката Веис да одбрани и пенал на Ризоска. Сепак во продолжение од мечот два напади со голови заврши Стефаноска за 4-4 по десетина минути игра.

Но потоа се намножија техничките грешки во нападот и Германија успеа да ги казни сите да отиде на плус пет, 12-7. Селекторот Грчевски ги промени ракометарките на бековските позиции, но немаше преголем ефект.

По дваесетина минути игра беше 15-9, па Грчевски мораше да побара тајм-аут. Седлоска намали со проектил на 15-10. Немаше идеја во нападот, тоа беше причина за изнудени удари, а грешките беа казнети со лесни голови во контра и веќе беше 18-10.

Црната серија ја прекина Кипријановска со гол од пенал за 18-11, а потоа Џатевска вторпат беше исклучена па и Германија лесно погоди. Беше 19-12, пред Кипријановска да намали со одличен пробив да погоди, а Ангела Јанкуловска да стави точка на првиот дел со гол од далечина за 19-14.

На стартот на вториот дел нашите ракометарките го имаа својот најдобар период во мечот. Илиќ им фати два зицери на Германките, потоа Јанкуловска и Кипријановска беа прецизни, а капитенот Гакидова намали на минус четири, 20-16.

Беше и 21-17, но потоа нов пад во игра, промашување и неколку технички грешки во серија, па ривалот одново отиде на плус девет, 26-17, највисока предност дотогаш. Германскиот селектор им даде шанса и на младинките од составот, па ги седна на клупа капитенот Дол и Беренд, а малку играше и Гријселс.

Се истакна и Петковска со две одбрани по зицер ситуации, но предноста на Германија и натаму беше висока. Македонските репрезентативки се бореа до крајот, имаа неколку добри потези и погодоци, но и Германките не попуштаа, па немаше шанси за некаков камбек или намалување на нивната залиха.

Најдобри стрелци во македонскиот состав беа Кипријановска со шест, како и Ангела Јанкуловска и Стефаноска со по четири погодоци, додека голманките Петковска и Илиќ собра девет одбрани. Кај Германија, Енгел даде девет гола.

Македонија е во игра за пласман на ЕП 2026, а повеќе детали за тоа како може да стигне до ново учество на континентален собир прочитајте ТУКА. Последниот натпревар го играме на гостински терен кај Словенија на 12 април од 18:00 часот.

Мелсунген се пласираше во четвртфиналето на Лига Европа откако во реваншот од осминафиналето ја „збриша“ Фредериција со 35-26, надополнувајќи ја негативата од шест гола од првиот меч во Данска (35-29). Во Топ-8 фазата ќе игра и Нексе, откако во реваншот беа подобри од Кристијанштад, 32-27, и така по вторпат триумфираше во осминафиналето (36-34 на првиот меч).

Мелсунген во четвртфиналето ќе игра против Порто, а Нексе се среќава со Кил.

Небојша Симиќ со 14 одбрани и Мохамед Амине Дармул со 9 гола го предводеа Мелсунген во пласман во четвртфиналето. Даинис Криштопанс постигна 6 гола. Уште на полувреме Германците имаа предност од „плус 5“ со која најавија дека се блиску до разлика што им е потребна. Во 55. минута домашните водеа со „плус 10“ за 32-22 кога се чинеше дека се е веќе решено.

Хрватски Нексе го имаа расположениот голман Марсел Јастржебски кој нанижа 16 успешни одбрани. Гостите од Шведска на полувреме имаа предност од 15-14, но штом започна вториот дел, домашните за три минути направија пресврт и поведоа со 18-15. Во 48 минута имаа предност од 27-21.

По поразот на Еурофарм Пелистер на домашен терен од екипата на Охрид, 27-26, јасно е дека повеќе од сигурно дека титулата по три сезони пауза ќе се врати во Скопје. Само чудо, и тоа огромно, треба да се случи за да не се валоризира сегашната предност на „црвено-црните“ во плеј-офот.

По четири одиграни кола во плеј-офот, Вардар има 50 бодови, додека Охрид е втор со 42, а исто толку има актуелниот првак Еурофарм Пелистер на третото место. Се играат вкупно десет кола.

Вардарци утре ги чека средба со Бутел Скопје од петтото коло, на која се големи фаворити, а по Ф4 во Купот на Македонија, кој е закажан за следниот викенд, ќе го одиграат дуелот со тимот на Лазаров на 25 април.

Победа на тој натпревар и математички ќе им ја донесе титулата на „црвено-црните“ на четири кола до крајот на плеј-офот, па ќе можат без притисок да се подготвуваат за двомечот од четвртфиналето на Лигата на Европа со францускиот Монпелје.

Три сезони по ред шампион на Македонија е Еурофарм Пелистер, но оваа сезона е јасно дека Вардар нема да пропушти прилика да се врати на тронот.

Екипите на Охрид и Целје ги потврдија термините за полуфиналните натпревари од ЕХФ Европскиот Куп.

Првата пресметка од макеоднско-словенечкиот двобој ќе се игра во Целје на 25 април, а допрва ќе биде позната саатницата.

Реваншот ќе биде на програмата на 2 мај, в сабота, во СРЦ „Билјанини Извори“, која сигурно повторно ќе биде полна до последното место.

Охрид досега запиша осум победи на осум натпревари во ЕХФ Европскиот Куп, во четвртфиналето го елиминира Олимпијакос, додека Целје беше подобар од романскиот Бузау.

По пласманот во полуфиналето на ЕХФ Европскиот Куп, ракометарите на Охрид им се враќаат на домашните обврски.

Охриѓани ги очекува тешко гостување кај шампионот Еурофарм Пелистер во дербито од 4 коло од суперлигашкиот плеј-оф.

Дефанзивецот Ориол Реј Моралес го најави мечот во Битола.

„Нè очекува тежок натпревар во еден од одлучувачките моменти од сезоната. Станува збор за дуел меѓу два квалитетни тима. Со добра подготовка и менталитет, имаме шанса да стигнеме до победа“, вели Моралес.

Натпреварот меѓу Еурофарм Пелистер и Охрид се игра в среда во салата „Боро Чурлевски“ со почеток од 18:00 часот.