Европската ракометна федерација ги делегираше официјалните лица за реванш натпреварите од осминафиналето на Лигата на Европа.

Покрај судиите Божиновски и Начевски, кои ќе го судат реваншот меѓу германскиот Мелсунген и данската Фредериција, активен ќе биде и Марјан Начевски.

Тој ќе биде делегат на реваншот од осминафиналето меѓу норвешкиот Елверум и францускиот Монпелје. Првиот меч го доби Монпелје со 36-24, а победникот од овој двомеч оди на четвртфинален двобој со Вардар.

Натпреварот на кој Начевски ќе биде делегат е закажан за утревечер, 7 април во „Тернинген Арена“ во Елверум со почеток од 18:45 часот.

Женската репрезентација на Полска се собра повторно по речиси едномесечна пауза, но подготовките за важните натпревари во ЕХФ Евро Купот започнаа со неочекувани проблеми.

Селекторот Арне Сенстад нема да биде со националниот тим на еден од домаќините на ЕП 2026 во почетната фаза од подготовките поради здравствени причини.

Норвешкиот стратег, непосредно пред планираното доаѓање во Полска, бил хоспитализиран. По неколкудневен престој е пуштен на домашно лекување и моментално се опоравува. Неговата состојба не е сериозна, но бара дополнителни консултации, поради што ќе го пропушти натпреварот против Словачка.

Сенстад сепак останува во постојан контакт со стручниот штаб на Полска и има надеж дека ќе се врати на клупата за дуелот против Романија, кој ќе се игра во Радом на 12 април.

Полска утре игра против Словачка, a мора да слави на овој меч, за в недела против Романките (кои во меѓувреме треба да загубат од Норвешка), да решаваат за второто место во групата и пласманот во полуфиналето каде веќе е Норвешка.

Тимот на ЦСКА Москва го освои трофејот во Купот на Русија, откако во финалето на Ф4 турнирот славеше над големиот ривал Ростов Дон, кој е предводен од легендарната Ирина Дибирова, која седеше и на клупата на Вардар.

На домашен терен во Москва, каде што се играше завршниот турнир, ЦСКА Москва победи со 30-25, откако и на паузата имаше плус два, 15-13.

Најдобри стрелци во победничкиот состав беа Семина и Санталова со по шест гола, а голманката Каплина имаше 12 одбрани. Кај Ростов Дон се истакна Стаценко со шест погодоци.

До овој натпревар, Ростов Дон имаше серија од 28 победи по ред оваа сезона и беше без загубен меч, но кога најмногу требаше тогаш некогашниот учесник во ЛШ не одигра на своето ниво. Шансата за одмазда ќе ја бара во првенството.

По пласманот во полуфиналето на ЕХФ Европскиот Куп, ракометарите на Охрид им се враќаат на домашните обврски.

Охриѓани ги очекува тешко гостување кај шампионот Еурофарм Пелистер во дербито од 4 коло од суперлигашкиот плеј-оф.

Дефанзивецот Ориол Реј Моралес го најави мечот во Битола.

„Нè очекува тежок натпревар во еден од одлучувачките моменти од сезоната. Станува збор за дуел меѓу два квалитетни тима. Со добра подготовка и менталитет, имаме шанса да стигнеме до победа“, вели Моралес.

Натпреварот меѓу Еурофарм Пелистер и Охрид се игра в среда во салата „Боро Чурлевски“ со почеток од 18:00 часот.

Женската репрезентација на Македонија денеска ќе се соочи со светскиот вицепрвак Германија во натпреварот од 5 коло во квалификациите за пласман на ЕП 2026.

Селекторот Кристијан Грчевски ги избра ракометарките за оваа пресметка, а од тие што беа повикани за оваа акција, од комбинација отпаднаа Теодора Дукоска, Леона Миленкоска, Таида Беровиќ и Матеа Чурлиновска.

Дамите се во трка по место на ЕП 2026, најверојатно преку третото место ако не направат изненадување против Германија или Словенија. Повеќе детали за шансите на Македонија прочитајте ТУКА.

Гостинките додјдоа со втор состав во кои ќе има пет дебитантки, но и неколку искусни ракометарки. Мечот се игра во СЦ „Борис Трајковски“ денеска од 18:00 часот, а влезот е слободен.

Германија е прва со осум бода и веќе пласирана на ЕП, Словенија има четири, додека Македонија и Белгија по два. Ако Словенките слават на гости кај Белгија, тогаш ќе го потврдат второто место на табелата во случај и Германија да победи во Скопје.