Кадетките со убедлив триумф над Турција до битка за 5. место

Репрезентативките на Македонија до 17 години после поразот од Полска се најдоа во разигрувањето за пласман од 5. до 8. место, а прв противник беа ракометарките на Турција против кои нашите кадетки остварија убедлива победа од 36:25 со што се избори за нов дуел против Белорусија, утре во 12 часот.

Почетокот на натпреварот беше многу израмнет и ефикасен. Веќе во 10. минута резултатот беше 8:8. Следуваше период на игра без погодок во кој двете екипи правеа грешки во нападите. Нашите репрезентативки први ја надминаа кризата и во продолжение погодија двапати во серија за водство од 10:8 во 18. минута.

Кризата во нападот на Турција траеше скоро десет минути, а единствена причина беше добрата игра во одбрана на Македонија. Во продолжение Турчинките направија уште неколку грешки што нашите ракометарки го искористија преку брзи контри за одлично водство од 14:10. Највисоката предност беше 16:11 но репрезентативките на Турција со добра игра во финишот ја намалија негативата на само два гола, па на полувреме Македонија имаше предност од 17:15.

Кадетките од Македонија го почнаа одлично вториот дел и веднаш го вратија водството од четири гола. Ритамот беше одличен и по десет минути игра беше 24:18. Тоа беше предност која најавуваше победа на натпреварот, а со сигурна игра и реализација нашите кадетки успешно ја одржуваа предноста од шест гола.

Во 52. минута Македонија стигна и до највисоката предност 30:23, со што практично беше решен победникот. До крајот на натпреварот одработеа рутински, а предността продолжи да расте за конечна победа со двоцифрена разлика од 11 гола, 36:25.

Уште еднаш одличен настап имаа Ангела Јанкуловска која постигна седум гола и Андреа Седлоска која беше прецизна шестпати од кои пет во вториот дел. Во противничкиот тим најефикасна беше Јапичи со десет гола.

МАКЕДОНИЈА – ТУРЦИЈА 36:25 (17:15)

МАКЕДОНИЈА: Грујовска, Трајкоска, Петреска, М. Ѓорѓиевска 1, С. Ѓорѓиевска 2, Белевска 3, Јовановска, Џатевска 3, Гроздановска 1, Јанкуловска 7, Костовиќ 1, Миновска 1, Седлоска 6, Коларовска 4, Петковска 4, Дамјаноска 3.

Седмерци: 2/3, Исклучувања: 10 мин.

ТУРЦИЈА: Чифчи 1, Гунгер, Чесур 1, Јурчу 3, Кесе 3, Ездемир, Челик 3, Касапоглу, Јапичи 10, Икиахирли, Гокдемир, Тезчан, Карарслан 2, Чоксунсу, Тузус 2, Ездеммир.

Седмерци: 3/4 Исклучувања 6 мин.